(ញូយ៉ក)៖ មនុស្សយ៉ាង​ហោចណាស់ ១២នាក់ បានស្លាប់​បង់​ជីវិត នៅក្នុងគ្រោះ​អគ្គីភ័យមួយ​ ដែលបានឆាបឆេះអគារស្នាក់នៅមួយកន្លែង ស្ថិតនៅ​តំបន់ Bronx ក្នុងទីក្រុង​ញូយ៉ក។ នេះបើតាម​អាជ្ញាធរ​អាមេរិក ដកស្រង់ដោយ​សារព័ត៌មាន BBC នៅព្រឹកថ្ងៃសុក្រ ទី២៩ ខែធ្នូ ឆ្នាំ២០១៧។

យោងតាម​អ្នកនំាពាក្យ​ការិយាល័យអភិបាល​ក្រុងញូយ៉ក អគ្គីភ័យនេះ​បានកើត​ឡើង នៅម៉ោង​ប្រមាណជា ៧៖០០នាទីយប់​ ថ្ងៃព្រហស្បតិ៍ រីឯក្រុមអ្នកពន្លត់​អគ្គីភ័យ ១៦០នាក់ ត្រូវបានបញ្ជូន​ទៅកន្លែង​កើតហេតុ។ ជាងនេះ​ទៅទៀត អ្នកនាំពាក្យរូបនេះ ក៏បានបញ្ជាក់​ដែរថាមនុស្ស ១៥នាក់​បានរងរបួស ខណៈមូលហេតុបង្កឱ្យមាន​អគ្គីភ័យនេះ កំពុងស្ថិតនៅ​ក្រោមការស៊ើប​អង្កេត​នៅឡើយ។

គួរបញ្ជាក់ថា អគារខាងលើ​ស្ថិតនៅក្បែរសាកលវិទ្យាល័យ Fordham University និងតំបន់ Bronx Zoo៕