(ហ្វីលីពីន)៖ គ្រោះរញ្ជួយដី​កម្រិត ៥.៧រ៉ិចទ័រ ដែលបានវាយប្រហារ​ប្រទេសហ្វីលីពីន នៅព្រឹក​ថ្ងៃសុក្រនេះ មិនបានបណ្ដាលឱ្យការខូចខាត​ធ្ងន់ធ្ងរ ឬក៏អ្នកស្លាប់​បាត់បង់​ជីវិតនោះទេ។ នេះបើតាម​អាជ្ញាធរហ្វីលីពីន​ ដកស្រង់ដោយទីភ្នាក់ងារ​សារព័ត៌មាន Reuters នៅព្រឹកថ្ងៃសុក្រ ទី២៩ ខែធ្នូ ឆ្នាំ២០១៧។

ជាមួយគ្នានោះដែរ បើតាមទីភ្នាក់ងារ​ស្ទាបស្ទង់ភូមិសាស្ត្រ​អាមេរិក USGS​ គ្រោះរញ្ជួយដីនេះ​មានចំណុចរំញ័រ​ស្ថិតនៅចំងាយ​ប្រមាណ ៣០២គីឡូម៉ែត្រ​ពីទីក្រុង General Santos នៃកោះ Mindanao ភាគខាងត្បូងប្រទេស ព្រមទាំងមាន​ជម្រៅទៅក្នុងដី ៥៤គីឡូម៉ែត្រ។ ហ្វីលីពីន​គឺជាប្រទេសមួយ ដែលមានទីតាំង​សណ្ឋានដី​ស្ដើង ដូច្នេះហើយ​ជាញឹកញយប្រទេស​ក្នុងតំបន់ អាស៊ីអាគ្នេយ៍​មួយនេះ តែងតែជួប​គ្រោះ​រញ្ជួយដី៕