(ហ្សេរុយសាឡឹម)៖ អ៊ីស្រាអែលកំពុងគ្រោងសាងសង់ស្ថានីយរថភ្លើងមួយ នៅក្នុងទីក្រុងហ្សេរុយសាឡឹម ហើយមានបំណងចង់ដាក់ឈ្មោះស្ថានីយនេះតាម លោក ដូណាល់ ត្រាំ ដើម្បីជាការអរគុណចំពោះលោកប្រធានាធិបតីអាមេរិក ដែលបានប្រកាសទទួលស្គាល់ទីក្រុងពិសិដ្ឋនេះ ជារដ្ឋធានីរបស់ប្រទេសអ៊ីស្រាអែល។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅព្រឹកថ្ងៃព្រហស្បតិ៍ ទី២៨ ខែធ្នូ ឆ្នាំ២០១៧។
រដ្ឋមន្រ្តីដឹកជញ្ជូនអ៊ីស្រាអែល លោក យីស្រាអែល ខេតស៍ (Yisrael Katz) បានថ្លែងថា «ខ្ញុំបានសម្រេចចិត្តថា ដាក់ឈ្មោះស្ថានីយរថភ្លើងដែលត្រូវគេគ្រោងនឹងសាងសង់ឡើងនៅក្នុងទីក្រុងហ្សេរុយសាឡឹម តាមប្រធានាធិបតីអាមេរិក លោក ដូណាល់ ត្រាំ សម្រាប់ការសម្រេចចិត្តដ៏អង់អាច និងជាប្រវត្តិសាស្រ្តរបស់លោក ក្នុងការទទួលស្គាល់ទីក្រុងហ្សេរុយសាឡឹម ជារដ្ឋធានីរបស់ប្រជាជនជ្វីប និងជារបស់ប្រទេសអ៊ីស្រាអែល»។
គួរជម្រាប បើតាមលោក Katz ទីតាំងសម្រាប់គម្រោងសាង់ស្ថានីយរថភ្លើងល្បឿនលឿននេះ ត្រូវបានជ្រើសរើសនៅក្បែរជញ្ជាំងភាគខាងលិច នៃទីក្រុងចំណាស់ហ្សេរុយសាឡឹម ពោលគឺនៅចំកណ្តាលតំបន់ដែលប្រជាជនប៉ាឡេស្ទីន ចង់បានធ្វើជារដ្ឋធានីនាពេលអនាគតរបស់ពួកគេ។
ម៉្យាងវិញទៀត គម្រោងខាងលើនេះ បើតាមអ្នកនាំពាក្យម្នាក់របស់ក្រសួងដឹកជញ្ជូនអ៊ីស្រាអែល នៅតែជារូបភាពគូសវាសលើក្តាខៀននៅឡើយទេ ដោយវាចាំបាច់ត្រូវមានការអនុញ្ញាតពីក្រសួងដទៃៗទៀត ហើយកាលបរិច្ឆេទជាក់លាក់ ថានឹងអាចចាប់ផ្តើមគម្រោងសាងសង់ទៅបាន ក៏ពុំទាន់ត្រូវបានកំណត់ផងដែរ។
គួររំលឹកផងដែរថា ការប្រកាសទទួលស្គាល់របស់ លោក ដូណាល់ ត្រាំ ចំពោះទីក្រុងហ្សេរុយសាឡឹមជា រដ្ឋធានីរបស់អ៊ីស្រាអែលកាលពីដើមខែនេះ បានបង្កឲ្យមានការថ្កោលទោសជាខ្លាំងពីអន្តរជាតិ ហើយកាលពីសប្តាហ៍មុន ការសម្រេចចិត្តដ៏ចម្រូងចម្រាសនេះ ត្រូវបានសមាជិកនៃមហាសន្និបាតអង្គការសហប្រជាជាតិ បោះឆ្នោតក្នុងសំឡេងភាគច្រើន ទាត់ចោលថែមទៀតផង៕
