(ឡូសអាន់ជែឡែស)៖ ទីក្រុងឡាសវេហ្គាស់ (Las Vegas) នៃរដ្ឋណេវ៉ាដា (Nevada) បានបំបែកកំណត់ត្រាអត់មានភ្លៀងធ្លាក់បន្តិចសោះ ក្នុងរយៈពេល ១០២ថ្ងៃ (គិតត្រឹមថ្ងៃអាទិត្យ ទី២៤ ខែធ្នូ) ដែលវាជាសញ្ញា នៃការទទួលរងគ្រោះធម្មជាតិធ្ងន់ធ្ងរទូទាំងសហរដ្ឋអាមេរិក ខណៈដែលរដ្ឋកាលីហ្វ័រញ៉ា ដែលស្ថិតនៅក្បែរគ្នានោះ ក៏បានទទួលរងភ្លើងឆេះព្រៃដ៏អាក្រក់ ប៉ុន្មានខែបន្តបន្ទាប់គ្នា។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នាល្ងាចថ្ងៃចន្ទ ទី២៥ ខែធ្នូ ឆ្នាំ២០១៧។
បើគិតមកត្រឹមថ្ងៃបុណ្យណូអែល ទី២៥ ខែធ្នូ ឆ្នាំ២០១៧នេះ គឺគ្រប់ ១០៣ថ្ងៃ ដែលទីក្រុង ឡាសវេហ្គាស់ អត់មានភ្លៀងធ្លាក់សោះ ហើយវាលើសពីកំណត់ត្រាកាលពីឆ្នាំ១៩៤៤ ទៅទៀត ដែលកាលណោះទីក្រុងដ៏ទំនើប និងពេញនិយមខ្លាំង ស្ថិតនៅភាគខាងលិចសហរដ្ឋអាមេរិកមួយនេះ អត់មានភ្លៀងធ្លាក់សោះបន្តបន្ទាប់គ្នារហូតដល់ ១០១ថ្ងៃ។
តាមការអះអាងពី សេវាកម្មអាកាសធាតុជាតិ (NWS) ការអត់ភ្លៀងសោះនេះ នឹងអាចអូសបន្លាយរហូតដល់ទៅ ១១០ថ្ងៃ ដោយផ្នែកព្យាករណ៍អាកាសធាតុបានអះអាងថា ភ្លៀងនឹងអាចធ្លាក់នៅដើមខែមករា ឆ្នាំ២០១៨ ឯណោះ។ សម្រាប់ពេញមួយឆ្នាំ២០១៧ នេះគឺជាឆ្នាំដែលអាមេរិកទទួលរងគ្រោះធម្មជាតិធ្ងន់ធ្ងរច្រើនករណី និងក្លាយជាកំណត់ត្រាថ្មីៗ។
គួរបញ្ជាក់ថា កាលពីខែកក្កដា ពាក់កណ្តាលឆ្នាំ២០១៧ កន្លងទៅ ជ្រលងមរណៈ Death Valley ស្ថិតនៅរវាងរដ្ឋ ណេវ៉ាដា និងរដ្ឋកាលីហ្វ័រញ៉ា អាកាសធាតុក្តៅបានបំបែកប្រវត្តិសាស្ត្រក្នុងតំបន់នេះ រយៈពេល ១០០ឆ្នាំ ដោយឡើងសីតុណ្ហភាពដល់ជិត ៤២អង្សាសេឯណោះ។ ដោយឡែកកាលពីខែសីហា ឆ្នាំ២០១៧ នៅជាយទីក្រុងឡូសអាន់ជែឡែស រដ្ឋកាលីហ្វ័រញ៉ា កម្តៅបានឡើងដល់ ៣៦.៦អង្សាសេ ដែលមិនធ្លាប់មាននោះឡើយ ក្នុងរយៈពេល ១៣១ឆ្នាំ៕
