(ម៉ានីល)៖ សាឡង់មួយ​គ្រឿងដឹកអ្នក​ដំណើរសរុប ២៥១នាក់ បានក្រឡាប់លិច​នៅឯកោះមួយ​ ស្ថិតនៅភាគខាងត្បូង​ទីក្រុងម៉ានីល នៃប្រទេសហ្វីលីពីន​ ដែលកំពុង​ទទួលរង​ឥទ្ធិពលពីព្យុះ និងភ្លៀងធ្លាក់​យ៉ាងខ្លាំង។ នេះបើតាម​ការចេញផ្សាយ​ដោយ ទីភ្នាក់ងារ​សារព័ត៌មាន Reuters​ នៅរសៀលថ្ងៃព្រហស្បតិ៍ ទី២១ ខែធ្នូ ឆ្នាំ២០១៧។

ជាមួយគ្នានោះដែរ បើតាមប្រព័ន្ធផ្សព្វផ្សាយ​នៅក្នុងស្រុក មនុស្សចំនួន ០៣នាក់បានស្លាប់ ក្នុងឧប្បដិហេតុ​លិចសាឡង់នេះ ខណៈក្រុមអ្នកជួយ​សង្រ្គោះកំពុងបន្ត​ប្រតិបត្តិការ​ជួយសង្រ្គោះ​នៅក្រោម​អាកាសអាក្រក់ និងរលកធំៗ​ដែលបង្កឡើង​ដោយព្យុះទីហ្វុង នៅភាគខាងត្បូង​នៃប្រទេស។ ចំណែកឯ​ទូកឆ្មាំសមុទ្រ ព្រមទាំង​ឧទ្ធម្ភាគចក្រ​ជាច្រើន គ្រឿងក៏ត្រូវបាន​បញ្ជូនទៅកាន់​កោះ Polilio ស្ថិត​ក្នុងខេត្ត Quezon ផងដែរ ដើម្បីជួយសង្រ្គោះ​អ្នកដំណើរ។

«យើងបាន​ទទួលព័ត៌មានពីគ្រោះ​ថ្នាក់លិចសាឡង់ ប៉ុន្តែយើង​នៅតែព្យាយាម​ប្រមូលព័ត៌មាន​ឱ្យច្បាស់​ ស្របពេលសាឡង់នេះ​ មានសមត្ថភាព​ផ្ទុកមនុស្ស ២៨០នាក់»។ នេះជាការ​លើកឡើងរបស់​អ្នកនាំពាក្យ​អាជ្ញាធរក្នុងតំបន់ លោក Armand Balilo។ ដោយឡែក ពុំមាន​សេចក្តីរាយការណ៍ អំពីចំនួនមនុស្សបាត់ខ្លួន ឬត្រូវបានជួយសង្គ្រោះនោះឡើយ។

គួរបញ្ជាក់ថា មូលហេតុនៃគ្រោះថ្នាក់លិចសាឡង់​ខាងលើ មិនទាន់ត្រូវបាន​គេបញ្ជាក់នៅឡើយទេ តែគ្រោះថ្នាក់របៀបនេះ តែងតែកើតឡើង​នៅហ្វីលីពីន នៅពេលមាន​ព្យុះវាយប្រហារមក​លើប្រទេស​ដីកោះជាង ១,៧០០ នេះម្ដងៗ៕