(វ៉ាស៊ីនតោន)៖ អ្នកឃ្លាំមើលម្នាក់ គឺលោកស្រី ហ្ស៊ីហាន (Sheehan) មកពី Conflict Armament Research (CAR) ដែលជាអង្គការអន្តរជាតិ ​ឃ្លាំមើល​អាវុធ​បានបង្ហើបព័ត៌មានថា បរិក្ខាយោធា​របស់សហរដ្ឋអាមេរិកផ្ដល់ឱ្យក្រុមប្រឆាំង​ស៊ីរី បានធ្លាក់ចូលក្នុង​កណ្ដាប់ដៃ​របស់ក្រុម ISIS។ នេះបើតាម​ការចេញផ្សាយ​ដោយ សារព័ត៌មាន Sputnik នៅព្រឹកថ្ងៃព្រហស្បតិ៍ ទី២១ ខែធ្នូ ឆ្នាំ២០១៧។

ថ្លែងនៅក្នុង​បទសម្ភាសន៍​ជាមួយ Sputnik កាលពី​ថ្ងៃពុធ លោកស្រី Sheehan បាន​លើក​​ឡើងដូច្នេះថា «សម្រាប់ខ្ញុំ វាហាក់ដូចជា​ទីភ្នាក់ងារស៊ើប​ការណ៍សំងាត់​អាមេរិក CIA មានបំណង​ប្រគល់អាវុធ​ឱ្យពួក ISIS​... ហើយម្យ៉ាងវិញ​ទៀត ខ្ញុំគិតថា នេះជាផែនការ​បង្កអស្ថេរភាព​ នៅតាមប្រទេស​ក្នុងតំបន់​មជ្ឈិមបូព៌ា ដើម្បីងាយ​ស្រួល​គ្រប់គ្រង ឬប្រមូល​ប្រភពធនធាន​ពី​ប្រទេស​ទាំងនោះ»។

គួរបញ្ជាក់ថា បើតាម​លោកស្រី Sheehan អាវុធជា ៤០,០០០ដើម ឬប្រភេទ ត្រូវបានគេរកឃើញ​នៅទីតាំងដែលពួក ISIS ធ្លាប់ធ្វើមូលដ្ឋាន ចាប់តាំងពីឆ្នាំ២០១៤មក ហើយអាវុធទាំង​នេះទៀត​សោត ភាគច្រើនត្រូវ​បាន​លក់ ឬផ្ដល់ឱ្យក្រុម​ប្រឆាំងស៊ីរី។ ជាងនេះ​ទៅទៀត លោកស្រី ក៏បាន​បញ្ជាក់ដែរថា CIA ក៏ធ្លាប់បាន​ដឹកនាំបេសកកម្ម​សំងាត់​បែបនេះ​ផងដែរ ក្នុងតំបន់​អាមេរិកឡាទីន នៅអំឡុង​ឆ្នាំ១៩៨០ ដើម្បីគាំទ្រដល់​ក្រុមប្រឆាំង​កុម្មុយនីស្ដ នៅក្នុងប្រទេស​នីហ្គារ៉ាហ្គ័រ៕