(សេអ៊ូល)៖ កូរ៉េខាងត្បូងគ្រោងនឹងទិញ យន្ដហោះចម្បាំងបំបាំងកាយ F-35A ចំនួន ២០គ្រឿង បន្ថែមទៀតពីសហរដ្ឋអាមេរិក ហើយដែលព័ត៌មាននេះកើតមានឡើងតែជាងពីរខែប៉ុណ្ណោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ ប្រកាសជាសាធារណៈថា ទីក្រុងសេអ៊ូល អាចបញ្ជាទិញអាវុធក្នុងតម្លៃរាប់ពាន់លានដុល្លារ។ នេះបើតាមការ ចេញផ្សាយទីភ្នាក់ងារសារព័ត៌មាន Reuters នៅព្រឹកថ្ងៃព្រហស្បតិ៍ ទី២១ ខែធ្នូ ឆ្នាំ២០១៧។
ជាមួយគ្នានោះដែរ សារព័ត៌មានកូរ៉េខាងត្បូង Joongang Ilbo ផ្អែកលើប្រភពដែលខ្លួនទទួលបានពីមន្ត្រីរដ្ឋាភិបាលបានឱ្យដឹងថា កម្មវិធីមួយត្រូវបានបង្កើតឡើងដើម្បី ដំណើរការនីតិវិធីទិញយន្ដហោះចម្បាំង ២០គ្រឿង បន្ថែមពីសហរដ្ឋអាមេរិក។ ដោយឡែកកាលពីឆ្នាំ២០១៤ កូរ៉េខាងត្បូងក៏ធ្លាប់បានប្រកាសជាផ្លូវការផងដែរ ពីគំរោងទិញយន្ដហោះចម្បាំង F-35A ចំនួន ៤០គ្រឿង នៅក្នុងបរិបទដែលកម្មវិធីមីស៊ីល និងអាវុធនុយក្លេអ៊ែររបស់កូរ៉េខាងជើង កាន់តែរីកចំរើនទៅមុខ។
គួរបញ្ជាក់ថា បើតាមក្រុមអ្នកជំនាញកូរ៉េខាងត្បូង កូរ៉េខាងជើងអាចនឹងដឹកនាំការធ្វើតេស្ដមីស៊ីលឆ្លងទ្វីប ICBM ជាថ្មីម្ដងទៀត ក្នុងពេលឆាប់ៗនេះ ក្រោយខ្លួនប្រកាសថា ចាប់ពីពេលនេះតទៅមីស៊ីលកូរ៉េខាងជើង មានលទ្ធភាពបាញ់ដល់គ្រប់ដែនដីគោកទាំងអស់ របស់សហរដ្ឋអាមេរិក។ ទោះបីជាមិនទាន់បញ្ជាក់តម្លៃជាផ្លូវការក៏ដោយ ប៉ុន្តែប្រភេទយន្តហោះ F-35A ដ៏អស្ចារ្យនេះជាធម្មតាមានតម្លៃខ្ទង់ ៩៤.៦លានដុល្លារ ដូច្នេះ២០គ្រឿង គឺស្មើនឹងជិត ២ពាន់លានដុល្លារ៕
