(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានគំរាមថា សហរដ្ឋអាមេរិក នឹងកាត់ផ្ដាច់ជំនួយហិរញ្ញវត្ថុដល់ប្រទេសណា ដែលហ៊ានបោះឆ្នោតគាំទ្រលើ ដំណោះស្រាយយូអិន «ថ្កោលទោសទីក្រុងវ៉ាស៊ីនតោន» ចំពោះការសម្រេចចិត្តទទួលស្គាល់ទីក្រុងហ្សេរុយសាឡឹម ជារដ្ឋធានីរបស់អ៊ីស្រាអែល។ នេះបើតាមការចេញផ្សាយ ដោយសារព័ត៌មាន BBC នៅព្រឹកថ្ងៃព្រហស្បតិ៍ ទី២១ ខែធ្នូ ឆ្នាំ២០១៧។
ថ្លែងនៅចំពោះមុខអ្នកសារព័ត៌មានកាលពីថ្ងៃពុធ (ម៉ោងនៅសហរដ្ឋអាមេរិក) លោក ដូណាល់ ត្រាំ បានគូសបញ្ជាក់យ៉ាងដូច្នេះថា «ពួកគេបានទទួលយកលុយរាប់លាន និងរាប់ពាន់លានដុល្លារពីសហរដ្ឋអាមេរិក តែពួកគេបែរជាចង់បោះឆ្នោតប្រឆាំងនឹងពួកយើងទៅវិញ... មិនអីទេឱ្យពួកគេបោះឆ្នោតប្រឆាំងនឹងពួកយើងចុះ ព្រោះថាវានឹងធ្វើឱ្យយើងសន្សំសម្ចៃបានកាន់តែច្រើន ហើយយើងមិនខ្វល់នោះទេ»។ ការសម្រេចចិត្តទទួលស្គាល់ទីក្រុងហ្សេរុយសាឡឹម ជារដ្ឋធានីអ៊ីស្រាអែលបានបង្កជាការរិះគន់ និងថ្កោលទោសយ៉ាងខ្លំាងពីអន្តរជាតិ ជាពិសេសគឺបណ្ដាប្រទេសអ្នកកាន់សាសនាអ៊ីស្លាមភាគច្រើន។
គួរបញ្ជាក់ថា មហាសន្និបាតអង្គការសហប្រជាជាតិមានសមាជិក ១៩៣ប្រទេស នឹងបើកកិច្ចប្រជុំ បន្ទាន់មួយនៅថ្ងៃព្រហស្បតិ៍សប្ដាហ៍នេះ ដើម្បីពិភាក្សាលើការទទួលស្គាល់ទីក្រុងហ្សេរុយសាឡឹម ជារដ្ឋធានីអ៊ីស្រាអែល។ ចំណែកឯការព្រមានរបស់ លោក ត្រាំ កើតមានឡើង ខណៈគេរំពឹងថា នៅក្នុងកិច្ចប្រជុំនេះមហាសន្និបាតនឹងបោះឆ្នោតគាំទ្រ លើដំណោះស្រាយថ្កោលទោស ក៏ដូចជាអំពាវនាវឱ្យសហរដ្ឋអាមេរិក លុបចោលការសម្រេចចិត្តនេះវិញ៕
