(សេអ៊ូល)៖ ពិធីបុណ្យសពរបស់តារាចម្រៀង លោក Kim Jong-hyun នឹងត្រូវធ្វើឡើងរយៈពេលបីថ្ងៃក្នុងទីក្រុងសេអ៊ូល ដើម្បីទុកឱកាសជាលើកចុងក្រោយដល់អ្នកគំាទ្រ ដាក់កម្រងផ្កា និងលារូបលោកជាលើកចុងក្រោយ។ នេះបើតាម​ការចេញផ្សាយដោយ​ទីភ្នាក់ងារ​សារព័ត៌មានយ៉ុនហាប់ នៅព្រឹកថ្ងៃពុធ ទី២០ ខែធ្នូ ឆ្នាំ២០១៧។

តារាចម្រៀង K-pop មកពីក្រុម SHINee គឺលោក Kim Jong-hyun បានបន្សល់ទុក​បណ្ដាំចុងក្រោយ​ ដ៏ឈឺចាប់សម្រាប់​អ្នកគំាទ្រ ដែលបញ្ជាក់​ពីស្ថានភាព សម្ពាធផ្លូវចិត្ត​របស់លោក មុននឹងលោកដាច់ចិត្ត​សម្លាប់ខ្លួនឯង។ លោក Kim ដែលគេតែង​តែហៅថា Jong-hyun បានស្លាប់បាត់បង់​ជីវិតកាលពីថ្ងៃចន្ទ ក្នុងបន្ទប់មួយស្ថិត​នៅក្នុងសង្កាត់ Cheongdam-dong នៃភាគខាងត្បូង​ទីក្រុង​សេអ៊ូល ហើយព្រមពេល​ជាមួយគ្នា ​លោកត្រូវបាន​គេបញ្ជូនទៅ​កាន់មន្ទីរពេទ្យភ្លាមៗ តែជា​អកុសល​​លោកបានស្លាប់​ទៅហើយ រីឯប៉ូលិសសន្និដ្ឋាន​ថា នេះជាករណីធ្វើ​អត្តឃាត។

ដោយឡែកជុំវិញ​រឿងនេះដែរ មិត្តភក្តិរបស់ លោក Jong-hyun គឺអ្នកនាង Jang Hee-yeon បានបង្ហោះ​នៅលើ Instagram​ នូវលិខិតបណ្ដាំ​ចុងក្រោយ របស់លោក Kim ដែលលោកផ្ទាល់​ចង់ឱ្យបណ្ដាំចុង​ក្រោយនេះ ត្រូវចេញផ្សាយ​ជាសាធារណៈ។ លិខិតនេះ​បានបញ្ជាក់​ដូច្នេះថា «ការបាកទឹកចិត្ត​កំពុងលេប​ត្របាក់ខ្ញុំ​បន្តិចម្ដងៗ ហើយខ្ញុំមិនអាច​យកឈ្នះវា​បានទេ... បា្រប់ខ្ញុំមកថា នេះវាគ្រប់គ្រាន់​ហើយ ថាខ្ញុំបាន​ធ្វើល្អ​ហើយ។ បើទោះជា​អ្នកមិនអាច​ញញឹម តែកុំ​បន្ទោសខ្ញុំ។ អ្នកធ្វើបាន​ល្អណាស់ អ្នកធ្វើបាន​ល្អហើយ។ លា​ហើយ!»។

គួរបញ្ជាក់ថា បើតាម​ប៉ូលិសការធ្វើកោសល្យ​វិច្ច័យប្រហែលជាមិនអាច​ត្រូវបានធ្វើឡើង​នោះទេ ពីព្រោះមានភស្ដុតាង​បញ្ជាក់ថា លោកបាន​សម្រេចចិត្តសម្លាប់​ខ្លួនឯង៕