(ម៉ានីល)៖ អាជ្ញាធរ​ហ្វីលីពីន​នៅថ្ងៃអង្គារនេះ បានឱ្យដឹងថា សាកសពមនុស្ស ១០នាក់ បន្ថែមទៀត​ត្រូវបាន​គេរកឃើញ នៅក្នុងភូមិដែល​រងគ្រោះ​ដោយសារ​គ្រោះរអិលបាក់ដី បង្កឡើង​ដោយព្យុះ Kai-Tak នៅក្នុងខេត្ត Biliran នៃភាគកណ្ដាល​ប្រទេសហ្វីលីពីន ហើយដែលនេះ​បានធ្វើឱ្យចំនួន​អ្នកស្លាប់កើនដល់ ៤១នាក់។ នេះបើតាមការចេញ ផ្សាយ​ដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃអង្គារ ទី១៩ ខែធ្នូ ឆ្នាំ២០១៧។

យោងតាម លោក Jun Dacillo ប្រធានអាជ្ញាធរ​គ្រប់គ្រងគ្រោះមហន្តរាយ​ប្រចំាខេត្ត Biliran សាកសពមនុស្សទាំង ១០នាក់​ ខាងលើនេះត្រូវបានគេរកឃើញ​នៅក្នុងភូមិមួយ ដែលរងគ្រោះ​ដោយសារគ្រោះ​រអិលបាក់ដី ស្ថិតនៅខេត្តភាគកណ្ដាលប្រទេស។ លោក Dacillo បាន​បន្ថែមទៀត​ថា មកទល់នឹងពេល​នេះ ចំនួនអ្នកសា្លប់កើន​ដល់ ៤១នាក់ ខណៈ មនុស្ស ២៣នាក់ នៅតែបន្តបាត់​ខ្លួននៅឡើយ។

គួរបញ្ជាក់ថា កាលពីថ្ងៃចន្ទ អ្នកនាំពាក្យ​ប្រធានាធិបតីហ្វីលីពី លោក Harry Roque បានឱ្យ​ដឹងថា ព្យុះ Kai-Tak បានបង្កផលប៉ះពាល់​ដល់ប្រជាជន ៦២,៣០៩ គ្រួសារ ហើយមនុស្ស ២៧០,៧០៧នាក់ ក៏ទទួលរងផល​ប៉ះពាល់ផងដែរ ស្របហេដ្ឋារចនាសម្ព័ន្ធ​មួយចំនួននៅក្នុង​ខេត្ត Biliran រងការខូចខាត​យ៉ាងដំណំ៕