(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ មិនបានច្រានចោល ចំពោះការលើកលែងទោសឲ្យ លោក Michael Flynn ដែលជាអតីតទីប្រឹក្សាសន្តិសុខជាតិរបស់លោក ដែលបានទទួលសារភាពកំហុស ក្នុងការផ្តល់សេចក្តីថ្លែងការណ៍ភូតកុហក ដល់ទីភ្នាក់ងារ FBI ក្រោមក្របខណ្ឌនៃការស៊ើបអង្កេត ទៅលើរឿងអាស្រូវពាក់ព័ន្ធរុស្ស៊ី របស់រដ្ឋអាជ្ញាពិសេស លោក Robert Mueller ឡើយ។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសៅរ៍ ទី១៦ ខែធ្នូ ឆ្នាំ២០១៧។
ថ្លែងប្រាប់ក្រុមអ្នកសារព័ត៌មាន លោក ដូណាល់ ត្រាំ បានលើកឡើងថា «ខ្ញុំមិនទាន់ចង់និយាយ អំពីការលើកលែងទោសឲ្យ លោក Michael Flynn នៅឡើយទេ។ យើងនឹងឃើញថា តើនឹងមានរឿងអ្វីកើតឡើង។ ចាំមើលសិន... ខ្ញុំអាចត្រឹមនិយាយដូច្នេះថា «នៅពេលដែលអ្នកក្រឡេកមើល ទៅលើអ្វីដែលកំពុងកើតឡើង ជាមួយទីភ្នាក់ងារស៊ើបអង្កេត FBI ព្រមទាំងក្រសួងយុត្តិធម៌ មនុស្សរាល់គ្នាមានការខឹងសម្បារជាខ្លាំង»។
គួររំលឹកថា កាលពីថ្ងៃទី០១ ខែធ្នូ លោក Flynn បានឆ្លើយសារភាពកំហុស ចំពោះការចោទប្រកាន់ អំពីការធ្វើសេចក្តីថ្លែងការណ៍កុហកចំនួនពីរ ដល់ការិយាល័យស៊ើបអង្កេតសហប្រព័ន្ធ ហៅកាត់ថា FBI ពាក់ព័ន្ធនឹងការធ្វើទំនាក់ទំនងរបស់លោក ជាមួយនឹងអតីតឯកអគ្គរដ្ឋទូតរុស្ស៊ី លោក Sergey Kislyak ក្រោយការបោះឆ្នោតអាមេរិក ឆ្នាំ២០១៦ និងនៅមុនពេលពិធីស្បថឡើងកាន់មុខតំណែងរបស់ លោក ដូណាល់ ត្រាំ។
នាពេលកន្លងមកវិញ ប្រធានាធិបតីអាមេរិក លោក ដូណាល់ ត្រាំ ក៏បានប្រើសិទ្ធិលើកលែងទោសរបស់លោក ចំពោះអតីតមេតម្រួតម្នាក់នៅរដ្ឋ Arizona ឈ្មោះ Joe Arpaio ដែលមានទោសពីបទប្រឆាំងនឹងដីកាតុលាការ ដែលបង្គាប់មិនឲ្យធ្វើការចាប់ខ្លួនជនអន្តោប្រវេសន៍ដែលពុំមានឯកសារត្រឹមត្រូវផងដែរ៕
