(វ៉ាស៊ីនតោន)៖ អគ្គរដ្ឋអាជ្ញារងអាមេរិក លោក Rod Rosenstein បានច្រានចោលការចោទប្រកាន់ របស់ក្រុមតំណាងរាស្ត្រមកពីគណបក្សសាធារណៈរដ្ឋ ដែលថា ក្រុមរដ្ឋអាជ្ញាអាមេរិក និងក្រុមស៊ើបអង្កេតពិសេស លើសំណុំរឿងរុស្ស៊ីលូកដៃចូលក្នុងកិច្ចការបោះឆ្នោតអាមេរិក កាលពីឆ្នាំ២០១៦ របស់លោក Robert Mueller មានភាពលម្អៀងចំពោះ លោកប្រធានាធិបតី ដូណាល់ ត្រាំ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅរសៀលថ្ងៃព្រហស្បតិ៍ ទី១៤ ខែធ្នូ ឆ្នាំ២០១៧។
ក្រុមអ្នកតំណាងរាស្ត្របក្សសាធារណៈរដ្ឋ បានរិះគន់កាន់ខ្លាំងលើរដ្ឋអាជ្ញាពិសេសអាមេរិក លោក Robert Mueller ថាមានភាពលម្អៀងចំពោះ លោក ត្រាំ បន្ទាប់ពីលោក Mueller បានចោទប្រកាន់លើអតីតមន្ត្រីជំនិត លោក ត្រាំ ចំនួនបួនរូបក្នុងសំណុំរឿងអាស្រូវផ្នែកទំនាក់ទំនង រវាងក្រុមយុទ្ធនាការរបស់លោក ជាមួយមន្ត្រីរុស្ស៊ី។ តែទោះជាបែបនេះក្ដី ថ្លែងក្នុងអំឡុងពេលផ្ដល់សក្ខីកម្ម នៅមុខគណៈកម្មាធិការយុត្តិធម៌ នៃសភាអាមេរិក លោក Rod Rosenstein បាននិយាយថា លោកមិនបានដឹងឡើយថា ក្រុមលោក Mueller បាន ប្រព្រឹត្តកំហុសឆ្គងណាមួយនោះទេ។ ជាងនេះទៅទៀត នៅពេលគណៈកម្មាធិការនេះ ចោទសួរថា តើលោកមានហេតុផលបណ្ដេញ លោក Mueller ពីតំណែងដែរ ឬទេ? លោក Rosenstein បានឆ្លើយថា «ទេ»។
គួរបញ្ជាក់ថា ក្រុមអ្នកតំណាងរាស្ត្រ នៃគណបក្សសាធារណៈរដ្ឋ រិះគន់លើ លោក Robert Mueller ដោយសំអាងលើសារឆ្លើយឆ្លងជាច្រើនរវាងបុគ្គលិក FBI ពីរនាក់ ក្នុងនោះរួមមានទាំងសមាជិកក្រុមស៊ើបអង្កេតរបស់លោកម្នាក់ ជាភស្ដុតាងបញ្ជាក់ពីភាពលម្អៀង ប្រឆាំងនឹង លោក ដូណាល់ ត្រាំ៕
