(កាណាដា)៖ យន្តហោះធុនមធ្យម​មួយគ្រឿង បានធ្លាក់នៅតំបន់​ភាគកណ្តាលប្រទេសកាណាដា តែសំណាង​ល្អមនុស្សជិះ​នៅលើនោះ​ទាំងអស់ ដែលត្រូវបាន​សារព័ត៌មានក្នុង​តំបន់រាយការណ៍ថា មានចំនួន ២៥នាក់នោះ មិនមាននរណាម្នាក់​បាត់បង់ជីវិត​នោះឡើយ ប៉ុន្តែពួកគេភាគច្រើនបានទទួលរងរបួសធ្ងន់ និងស្រាល។ នេះបើតាមការចេញផ្សាយ​នៅមុននេះបន្តិច ដោយសារព័ត៌មានចិន ស៊ីនហួរ នារសៀលថ្ងៃព្រហស្បតិ៍ ទី១៤ ខែធ្នូ​ ឆ្នាំ២០១៧។

យោងតាមអាជ្ញាធរកាណាដា យន្ដហោះខាងលើ​បានធ្លាក់នៅក្បែរ​អាកាស​យានដ្ឋាន Fond du Lac ស្ថិតនៅភាគខាងជើង​ខេត្ត Saskatchewan ភាគកណ្តាលប្រទេស បន្ទាប់ពីបានហោះ​ឡើង​ក្នុងរយៈពេលខ្លី​នៅម៉ោង ៦៖១៥នាទីល្ងាច ថ្ងៃពុធ (ម៉ោងនៅក្នុងតំបន់)។ ចំណែកឯ​អាជ្ញាធអាកាសចរណ៍ស៊ីវិលកាណាដា ក៏បានឱ្យដឹងដែរថា យន្ដហោះដែល​ជួបឧប្បដិហេតុនេះ គឺជាប្រភេទយន្ដហោះធុន ATR-42 ហើយមានផ្ទុកមនុស្ស ២៥នាក់ ក្នុងនោះ ០៣នាក់ ជាក្រុមអាកាស​យាននិក។

គួរបញ្ជាក់ថា បើតាមសេចក្ដីរាយការណ៍​បឋម មនុស្សជាច្រើននាក់​បានរងរបួស តែមិនមានអ្នកបាត់បង់ជីវិត​ឡើយ ខណៈមូលហេតុ​ធ្លាក់កំពុងស្ថិតនៅក្រោម​ការស៊ើបអង្កេត ក្រោយមានសេចក្ដីរាយការណ៍ថា យន្ដហោះនេះបាន​ធ្លាក់ នៅពេលទើបហោះឡើង​បានចំងាយមួយ​គីឡូម៉ែត្រប៉ុណ្ណោះ៕