(សេអ៊ូល)៖ សេតវិមាន​បាននិយាយថា បច្ចុប្បន្ន​មិនមែនជា​ពេលវេលា​ត្រូវអង្គុយចរចា ជាមួយកូរ៉េខាងជើង​​នោះទេ ហើយការលើកឡើង​បែបនេះធ្វើឡើង​ តែមួយថ្ងៃប៉ុណ្ណោះ បន្ទាប់ពីរដ្ឋមន្ត្រី​ការបរទេស​អាមេរិក លោក រិច ធីល្លឺសុន បានផ្ដល់កិច្ចចរចា​ឥតលក្ខខណ្ឌ​ដល់ទីក្រុង​ព្យុងយ៉ាង។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃព្រហស្បតិ៍ ទី១៤ ខែធ្នូ ឆ្នាំ២០១៧។

លោក ធីល្លឺសុន កាលពី​ថ្ងៃអង្គារបានអះអាងថា ទីក្រុងវ៉ាស៊ីនតោន​បានត្រៀមខ្លួន​រួចជាស្រេច ដើម្បីចរចាជា​មួយ​កូរ៉េខាងជើង ដោយគ្មាន​លក្ខខណ្ឌ។ ប៉ុន្តែគេមិនទាន់​ច្បាស់​ថា ការកត់សម្គាល់​នេះ ទទួលបានការយល់ព្រម​ពីប្រធានាធិបតី​អាមេរិក លោក ដូណាល់ ត្រាំ ឬយ៉ាងណា​នោះទេ ខណៈលោក ត្រាំ តែងតែប្រើមាត់​របស់លោក​គំរាមប្រើ កម្លាំងយោធា​ កម្ទេចទីក្រុងព្យុងយ៉ាង​ឱ្យក្លាយ​ជាផេះ។

ជុំវិញការខ្វែងគំនិតគ្នា​នេះដែរ ថ្លែងប្រាប់ទីភ្នាក់ងារសារព័ត៌មាន​យ៉ុនហាប់ អ្នកនំាពាក្យ​ក្រុមប្រឹក្សា​សន្តិសុខជាតិ សេតវិមានម្នាក់​បានគូសបញ្ជាក់យ៉ាងដូច្នេះថា «បច្ចុប្បន្នមែន​ជាពេលត្រូវអង្គុយ​ចរចា ​ជាមួយកូរ៉េខាងជើង​នោះទេ​ ស្របពេល​កូរ៉េខាងជើង​ចេះតែបង្ករឿងឥតឈប់ឈរ​ជាក់ស្ដែង តាមរយៈការ​ធ្វើតេស្ដ មីស៊ីលឆ្លងទ្វីប​នាពេលថ្មីៗនេះ... ហើយគោល​នយោបាយ នៃរដ្ឋបាលអាមេរិកចំពោះ​កូរ៉េខាងជើង មិនផ្លាស់​ប្ដូរឡើយ បើទោះជាយើង​បានលើកឡើង​ជាច្រើនដង ពីលទ្ធភាព​ចរចាជាមួយទីក្រុង​ព្យុងយ៉ាង​ក៏ដោយ»។

គួរបញ្ជាក់ថា បើតាមអ្នកនាំ​ពាក្យរូបនេះ ដើម្បីឈាន​ដល់កិច្ចចរចា កូរ៉េខាងជើង​ត្រូវតែបញ្ឈប់​សកម្មភាព​បង្ករឿងរបស់ខ្លួន​ជាមុនសិន ព្រមទាំងបង្ហាញ​ពី​ភាពស្មោះត្រង់ ក្នុងការលុបបំបាត់​អាវុធនុយក្លេអ៊ែរ​នៅលើ​ឧបទ្វីបកូរ៉េ៕