(វ៉ាស៊ីនតោន)៖ កងទ័ពអាកាស​អាមេរិក បានបាញ់ធ្វើតេស្ត​មីស៊ីល​រយៈ​ចម្ងាយ​​​ឆ្ងាយ​ប្រឆាំង​នាវាចម្បាំង LRASM ចេញពីយន្ត​ហោះ​​ទម្លាក់គ្រាប់បែក​ដ៏មានអានុភាព B-1B ដោយ​ជោគជ័យ។ នេះបើតាមការចេញ​ផ្សាយដោយ សារព័ត៌មានរុស្ស៊ី Sputnik នៅព្រឹកថ្ងៃ​ពុធ ទី១៣ ខែធ្នូ ឆ្នាំ២០១៧។

ក្រុមហ៊ុនផលិត​សព្វាវុធដ៏ល្បីរបស់​សហរដ្ឋអាមេរិក Lockheed Martin បានឲ្យដឹង​ក្នុងសន្និសីទ​សារព័ត៌មាន​មួយថា ក្នុង​អំឡុង​​ការ​ធ្វើ​តេស្ត​​នៅ​លើ​​ទីតាំងធ្វើតេស្ត​ក្នុងរដ្ឋ​កាលីហ្វរញ៉ា ក្រុមអាកាសយានិករបស់ យន្តហោះ B-1B បានបាញ់មីស៊ីល LRASM ចំនួន​ ០២​គ្រាប់ ​ព្រមៗ​​គ្នា​​សំដៅទៅ​លើគោលដៅ​លើផ្ទៃទឹក ហើយសម្រេច​កម្មវត្ថុចម្បង នៃការសាកល្បង​ដោយជោគជ័យ។

គួរជម្រាបថា មីស៊ីល LRASM ត្រូវបានរចនាឡើង ដើម្បីរុករកនិង​កម្ទេច​គោលដៅ​ជាក់លាក់នានា នៅក្នុងក្រុមនាវាចម្បាំង​។ មីស៊ីលដ៏ទំនើបនេះ អាចប្រើប្រាស់ដើម្បី​វាយប្រហារទៅលើ​នាវាចម្បាំង នាវាមុជទឹក​ជម្រៅរាក់ៗ, យន្តហោះដ្រូន, យន្តហោះ​​ចម្បាំង, រួមទាំងគោលដៅ​នៅលើដីគោក​ផងដែរ។ កាលពីខែកក្កដាកន្លងទៅ កងទ័ព​​អាមេរិក​ផ្តល់​កុងត្រាឲ្យ​ក្រុមហ៊ុន Lockheed Martin តម្លៃ ៨៦លានដុល្លារ ដើម្បីផលិត​​មីស៊ីល​ LRASM ចំនួន ២៣គ្រាប់ ដំបូង៕