(សេអ៊ូល)៖ លោក គីម ជុងអ៊ុន បានប្តេជ្ញាថា នឹងកសាងប្រទេស​កូរ៉េខាងជើង ឲ្យក្លាយទៅ​ជា​មហាអំណាច​នុយក្លេអ៊ែរ​​ដ៏ខ្លាំង​ក្លាបំផុត នៅលើពិភពលោក ខណៈប្រជាជាតិ​ដ៏រឹងទទឹងនេះ ហាក់ដូចជា​មិនបានបង្ហាញ​សញ្ញាថា នឹងបន្ថយល្បឿន​អភិវឌ្ឍន៍ កម្មវិធី​​អាវុធ​ប្រល័យលោក​របស់ខ្លួន ដែលកំពុងបង្ក​ក្តីព្រួយបារម្ភជា​ខ្លាំងដល់អន្តរជាតិ​ទាំងមូល អ្វីបន្តិច​សោះ។ នេះបើតាម​សេចក្តីរាយ​ការណ៍របស់ប្រព័ន្ធផ្សព្វផ្សាយ ​រដ្ឋកូរ៉េខាងជើង ដកស្រង់ដោយ​សារព័ត៌មាន Channel News Asia នៅព្រឹក​ថ្ងៃ​ពុធ ទី១៣ ខែធ្នូ ឆ្នាំ​២០១៧។

យោងតាមទីភ្នាក់​ងារព័ត៌មាន KCNA លោក គីម បានប្រាប់ក្រុម​ការងារ នៅពី​ក្រោយ​ការធ្វើតេស្ត​នាពេលថ្មីៗនេះ នៃមីស៊ីលផ្លោង​​ជំនាន់ថ្មី​របស់ខ្លួនថា ប្រទេសជាតិ​របស់លោក នឹងរីកចម្រើន​ទៅមុខប្រកបដោយ​ភាពជោគជ័យ ហើយបោះជំហាន​ឈានក្លាយ​ទៅជា​មហាអំណាច​យោធា និងមហាអំណាច​នុយក្លេអ៊ែរ​ដ៏ខ្លាំងជាងគេបង្អស់ នៅលើពិភពលោក។

គួរជម្រាបថា ការប្តេជ្ញាយ៉ាងមុតមាំ​បែបនេះ​របស់ លោក គីម ជុងអ៊ុន បានកើត​មានឡើង​គាប់ជួន​​ពេលដែល​ប្រមុខការទូត​អាមេ​រិក លោក រ៉ិច ធីល្លឺសុន បានបង្ហាញ​ជំហរទន់ភ្លន់​ជាងមុន ស្តីពីការ​បើកកិច្ចចរចា​ជាមួយ​កូរ៉េខាងជើង ដែលលែង​តម្រូវឲ្យ​មានលក្ខ​ខណ្ឌ​ដោះដូរ​ជាមុនទៀត​ឡើយ។ ការថ្លែងរបស់ លោក គីម ធ្វើឡើងនៅក្នុងសន្និសីទមួយ ដែលមានការចូលរួមពីក្រុមអ្នក​វិទ្យាសាស្ត្រ និងអ្នកជំនាញនានាក្នុងស្រុក ដែលកូរ៉េខាងជើង​កំពុងលើកតម្កើង ដើម្បីអភិវឌ្ឍន៍វិស័យការពារជាតិ​របស់ខ្លួន ដោយចាត់ទុក​សហរដ្ឋអាមេរិក និងសម្ព័ន្ធមិត្ត​របស់មហាអំណាចនេះ ជាការគំរាមកំហែង​ដល់ខ្លួន​ខ្លាំងបំផុត៕