(ប៉េកាំង)៖ កងកម្លាំងទ័ពអាកាសចិន បានដឹកនាំការធ្វើសមយុទ្ធហោះហើរល្បាតជាទម្លាប់ កាត់តាមច្រកសមុទ្រ បាហ្ស៊ី (Bashi) និង មីយ៉ាកុ (Miyako) ហើយដែលការហោះហើរនេះ ធ្វើឡើងស្របទៅតាមច្បាប់អន្តរជាតិ។ នេះបើតាមអ្នកនាំពាក្យកងកម្លាំងទ័ពអាកាសចិន ដកស្រង់ដោយ ទីភ្នាក់ងារសារព័ត៌មានចិន ស៊ីនហួរ នៅរសៀលថ្ងៃអង្គារ ទី១២ ខែធ្នូ ឆ្នាំ២០១៧។
ថ្លែងនៅក្នុងជំនួបមួយនៅថ្ងៃអង្គារនេះ អ្នកនាំពាក្យកងកម្លាំងទ័ពអាកាសចិន លោក ហ្សេន ជីងកេ (Shen Jinke) បានឱ្យដឹងថា ការធ្វើសមយុទ្ធហោះហើរនេះ មានការចូលរួមពីយន្ដហោះ ទម្លាក់គ្រាប់បែក H-6K, យន្ដហោះចម្បាំង Su-30, J-11 fighters, យន្ដហោះស៊ើបការណ៍, យន្ដហោះប្រកាសអាសន្ន និងយន្ដហោះដឹកប្រេងជាដើម។ មួយវិញទៀត ការធ្វើសមយុទ្ធ នេះទៀតសោត គឺមានគោលបំណងពង្រឹងសមត្ថភាព ហោះហើររយៈចំងាយឆ្ងាយ ព្រមទាំងសមត្ថភាពការពារដែនអធិបតេយ្យជាតិ និងបូរណភាពទឹកដី។
គួរបញ្ជាក់ថា បើតាមលោក Shen Jinke ការធ្វើសមយុទ្ធយោធារបស់ចិន គឺធ្វើឡើងដោយស្របច្បាប់អន្តជាតិ ក៏ដូចជាទម្លាប់ធម្មតាប៉ុណ្ណោះ ហើយកងកម្លាំងទ័ពអាកាស ចិននឹងបន្តដឹកនាំការធ្វើសមយុទ្ធហោះហើរ រយៈចំងាយឆ្ងាយនៅពេលអនាគត៕
