(វ៉ាស៊ីនតោន)៖ អ្នកនាំពាក្យសេតវិមានអាមេរិក លោកស្រី សារ៉ាហ័ សេនដឺស (Sarah Sanders) បាននិយាយថា បើសិនជាគោលនយោបាយ ទប់ស្កាត់អន្តោប្រវេស៍ របស់លោកប្រធានាធិបតី ដូណាល់ ត្រាំ ត្រូវបានដាក់អនុវត្តន៍ពេញលេញ នោះអ្នកវាយប្រហារនឹងមិនត្រូវបានអនុញាត ឱ្យចូលជាន់ដីសហរដ្ឋអាមេរិកនោះទេ។ នេះបើតាមការចេញផ្សាយដោយ សារព័ត៌មាន BBC នៅព្រឹកថ្ងៃអង្គារ ទី១២ ខែធ្នូ ឆ្នាំ២០១៧។
ថ្លែងនៅក្នុងសន្និសីទសារព័ត៌មានដ៏ខ្លីមួយ បន្ទាប់ពីមានការវាយប្រហារបំផ្ទុះគ្រាប់បែកក្នុងទីក្រុងញូយ៉ក លោកស្រី Sarah Sanders បានលើកឡើងដូច្នេះថា «ការវាយប្រហារនេះ បានបញ្ជាក់យ៉ាងច្បាស់ពីភាពចាំបាច់ ដែលសភា ត្រូវតែធ្វើការងាររួមគ្នាជាមួយលោកប្រធានាធិបតី ពាក់ព័ន្ធនឹងការធ្វើកំណែងទម្រង់ច្បាប់អន្តោប្រវេសន៍ ដើម្បីពង្រឹងសន្តិសុខជាតិរបស់យើង ព្រមទាំងសុវត្ថិភាពសាធារណៈ»។
គួរបញ្ជាក់ថា ហេតុការណ៍ផ្ទុះមួយបានកើតឡើងកាលពីថ្ងៃចន្ទ នៅម៉ោងប្រមាណជា ៧៖៣០នាទីព្រឹក ថ្ងៃចន្ទ (ម៉ោងនៅទីក្រុងញូយ៉ក) នៅឯផ្លូវក្រោមដីមួយកន្លែង ភ្ជាប់ពីទីលានTimes Square ទៅកាន់ចំណតរថយន្ដក្រុង Port Authority។ រីឯប៉ូលិសអាមេរិកក៏បានឱ្យដឹងដែរថា ជនសង្ស័យម្នាក់ឈ្មោះ អាកាយ៉េដ អ៊ូលឡាហ៍ (Akayed Ullah) មានអាយុ ២៧ឆ្នាំ និងជាជនអន្តោប្រវេសន៍បង់ក្លាដែសត្រូវបានចាប់ខ្លួន ហើយបើតាមប្រព័ន្ធផ្សព្វផ្សាយអាមេរិក ជនរូបនេះបានប៉ុនប៉ងវាយប្រហារ ដោយបំផ្ទុះគ្រាប់បែកអត្តឃាត តាមការបង្គាប់បញ្ជាពីពួក ISIS ប៉ុន្តែមិនបានសម្រេច៕
