(អង់ការ៉ា)៖ កិច្ចព្រមព្រៀងទិញ​ប្រព័ន្ធមីស៊ីល S-400 ពីរុស្ស៊ី ដែលជាការធ្វើ​ឲ្យទំនាក់ទំនង​រវាងអឺរ៉ុប-អាមេរិក និងតួកគី កាន់តែឃ្លាតឆ្ងាយពីគ្នានោះ ត្រូវបានលោកប្រធានាធិបតី តាយយីព អេដូហ្កាន់ (Tayyip Erdogan) អះអាងថា នឹងសម្រេចចេញជាស្ថាពរនៅក្នុង​សប្តាហ៍នេះហើយ។ នេះបើតាមការចេញ​ផ្សាយដោយ ទីភ្នាក់ងារព័ត៌មានចិន ស៊ីនហួរ នាព្រឹកថ្ងៃអង្គារ ទី១២ ខែធ្នូ ឆ្នាំ២០១៧។

សេចក្តីថ្លែងការណ៍​ខាងលើនេះ ត្រូវបានប្រកាសចេញ​នៅក្រោយជំនួប រវាងប្រធានាធិបតីតួកគី លោក អេដូហ្កាន់ ជាមួយនិងសមភាគីរុស្ស៊ី លោក វ្ល៉ាឌីមៀ ពូទីន ដែលមកបំពេញទស្សនកិច្ច​នៅរដ្ឋធានីអង់ការ៉ា របស់តួកគី។ លោក អេដូហ្កាន់ បានបញ្ជាក់យ៉ាងដូច្នេះថា «ក្រុមមន្ត្រី​របស់យើង នឹងជួបពិភាក្សាគ្នាចុងក្រោយនៅក្នុងសប្តាហ៍នេះ ដើម្បីធ្វើការសម្រេចតែម្តង»។

គួរបញ្ជាក់ថា កិច្ចពិភាក្សាតំណាក់កាល​សំខាន់រវាងភាគីទាំងពីរ ត្រូវបានធ្វើឡើង​កាលពី​​ថ្ងៃទី១២ ខែកញ្ញា ឆ្នាំ២០១៧ ដោយទីក្រុងម៉ូស្គូ និងទីក្រុងអង់ការ៉ា បានឈាន​ដល់កិច្ចព្រមព្រៀង​ទិញ​ប្រព័ន្ធមីស៊ីល S-400​ ពីរុស្ស៊ី ហើយរហូត​ដល់ថ្ងៃទី២៩ ខែកញ្ញា មន្ត្រីជាន់ខ្ពស់រុស្ស៊ី​ លោក Vladimir Kozhin បានទទួល​ស្គាល់ថា តួកគី​បានបង់ប្រាក់កក់ និងអាចទទួលបាន S-400 នៅឆ្នាំ២០១៩។ រុស្ស៊ី​ និងតួកគី បានចាប់ផ្ដើម​កិច្ចចរចាបញ្ជា​ទិញ​ប្រព័ន្ធ មីស៊ីលនេះ​កាលពី​ឆ្នាំមុន៕