(អាមេរិក)៖ ស្របពេលដែល​រដូវឈប់​សម្រាកចុងឆ្នាំជិតចូលមកដល់ ប៉ូលិស​ទីក្រុងហួស្តុន (Houston) រដ្ឋតិចសាស់ កំពុង​តែ​មាន​​ការ​ប្រុងប្រយ័ត្ន​​យ៉ាង​​ខ្ពស់ ខណៈនាពេល​កន្លងមកនេះ មាន​​ការ​រាយ​ការណ៍​ច្រឡំដល់ទៅ ០៣លើក ក្នុងកំឡុង​ពេល ១០ថ្ងៃប៉ុណ្ណោះ ស្តីពីហេតុ​ការ​ណ៍​​ផ្ទុះអាវុធ បានបង្កឲ្យមានគេរត់យ៉ាងប្រសាចចេញពីហាង និងផ្សារទំនើបនានា នៅក្នុងទីក្រុងធំ​បំផុត​លំដាប់​ទីបួន​ប្រចាំ​​សហរដ្ឋអាមេរិក​មួយនេះ។ នេះបើតាម​ការចេញ​ផ្សាយ​ដោយ ទីភ្នាក់ងារ​ព័ត៌មានចិន​ ស៊ីនហួរ នៅរសៀល​ថ្ងៃចន្ទ ទី១១​ ខែធ្នូ ឆ្នាំ២០១៧។

ទោះបីជា​សេចក្តីរាយការណ៍​ទាំងប៉ុន្មាននោះ ចុងក្រោយសុទ្ធ​តែពុំមានពាក់ព័ន្ធ​នឹងខ្មាន់កាំភ្លើង​ណាម្នាក់ក៏ដោយ កម្លាំង​ប៉ូលិស​​ប្រចាំ​ទីក្រុង Houston នៃរដ្ឋតិចសាស់ កំពុងប្រុងជើងការ​ជាប់ជានិច្ច ស្របពេល​ដែលមនុស្សម្នា​រាប់ពាន់នាក់ បន្តដើរ​ទិញ​ឥវ៉ាន់​​ពេញៗ​ផ្សារ​ទំនើប ខណៈដែល​ថ្ងៃ​បុណ្យគ្រិស្មាស់ និងចូលឆ្នាំសកលជិត​ចូលមក នាប៉ុន្មានសប្តាហ៍​ទៀត​ប៉ុណ្ណោះ។

គួរជម្រាបថា កាលពីថ្ងៃទី០២ ខែធ្នូ ហេតុការណ៍​បាញ់ប្រហារ​មួយ ត្រូវគេរាយការណ៍​នៅឯផ្សារ​ទំនើប Memorial City Mall ដែលបាន​បណ្តាលឲ្យអ្នកដើរទិញ​ឥវ៉ាន់​រាប់រយនាក់ រកកន្លែងគេច​ខ្លួន និងខ្លះទៀតរត់ចេញ​តាមចក្រទ្វានានា ដែលពួកគេបាន​ប្រទះឃើញ។ អ្វី​ដែលពួកគេគិតថា ជាស្នូរកាំភ្លើងនោះ ការពិតគឺជា​សកម្មភាពរបស់​ចោរម្នាក់ ប្រដាប់ដោយ​ញញួរ បានព្យាយាមគាស់​ទូរកញ្ចក់ដែល​ផ្ទុកនូវគ្រឿង​អលង្កាមានតម្លៃ។

ក្រៅពីនេះ កាលពីថ្ងៃទី០៤ ខែធ្នូ អ្នកដើរទិញឥវ៉ាន់​ក្នុងផ្សារទំនើបមួយកន្លែង នៅទីប្រជុំជនក្រុង Houston បាននាំគ្នារត់ភៀសខ្លួន​​នៅ​ពេលដែលពួកគេគិតថា ខ្លួនបានលឺ​សំឡេងកាំភ្លើង ដែលតាមពិត​គឺជាសំឡេង​កូនក្មេងធ្លាក់ពី​លើរទេះ​ ហើយរមាលលើ​ជណ្តើរយន្ត។ ករណីចុងក្រោយ គឺបានកើតមានឡើង​នៅថ្ងៃទី០៩ ខែធ្នូប៉ុន្មាន​ថ្ងៃមុននេះ ដោយមនុស្សម្នាបាន​នាំគ្នារត់យ៉ាង​ប្រសាច ចេញពីចំណត​រថយន្ត​នៃផ្សារទំនើប Baybrook Mall ព្រោះតែពួកគេគិត​ថា បានលឺស្នូរកាំភ្លើង។ ជុំវិញ​ហេតុការណ៍នេះ ប៉ូលិសបានឲ្យដឹងថា ​​ពួក​គេ​​ក៏មិនដឹង​ច្បាស់ដែរថា មូលហេតុអ្វីទើប​បានបង្កឲ្យអ្នកដើរផ្សារ​ទាំងនោះ នាំគ្នារត់ពីកន្លែង​ចតរថយន្តដូច្នោះ ក៏ប៉ុន្តែក៏ពុំមានភស្តុតាង​​ស្តីពីការផ្ទុះ​អាវុធដែរ។

យ៉ាងណាមិញ អតីតភ្នាក់ងារ​ស៊ើបអង្កេត FBI និងជាអ្នកជំនាញមួយរូបផ្នែក​បញ្ហាសន្តិសុខ​សុវត្ថិភាព លោក Jim Conway បាន​លើក​​ឡើងថា មនុស្សរាល់គ្នាគួរតែគិតគូរ​អំពីស្ថានការណ៍​ដ៏អាក្រក់បំផុត ដែលអាច​កើតមានឡើង នៅពេលស្ថិតក្នុងទីកន្លែង​ដែលសម្បូរ​ដោយមនុស្ស​ច្រើនកុះករ៕