(សេអ៊ូល)៖ រដ្ឋមន្ត្រីការបរទេស​កូរ៉េខាងត្បូង លោកស្រី កាង គ្យុងវ៉ា (Kang Kyung-wha) បានសង្កត់ធ្ងន់​ពីភាពចាំបាច់​ ត្រូវតែមានបណ្ដាញ​ទំនាក់ទំនង​ដ៏មានប្រសិទ្ធភាព​ជាមួយ កូរ៉េខាងជើង ក្រោយទីក្រុង​ព្យុងយ៉ាង បាញ់សាកល្បង​មីស៊ីលឆ្លងទ្វីប កាលពីចុងខែវិច្ឆិកាកន្លងទៅ។ នេះបើតាម​ការចេញ​ផ្សាយដោយ ទីភ្នាក់ងារ​សារព័ត៌មាន​ចិន ស៊ីនហួរ នៅរសៀលថ្ងៃចន្ទ ទី១១ ខែធ្នូ ឆ្នាំ២០១៧។

ការកត់សម្គាល់​បែបនេះ​របស់ លោកស្រី Kang ធ្វើឡើងនៅ​ឯវេទិកាមួយ រៀបចំឡើងក្នុង​ទីក្រុងសេអ៊ូល នៅថ្ងៃចន្ទនេះ។ ថ្លែងនា​ឱកាស​នោះដែរ លោកស្រី Kang បានលើក ឡើងថា បណ្ដាញទំនាក់ទំនង​ដ៏មានប្រសិទ្ធិភាព គួរតែអាចបញ្ជូន​សំឡេងរួម​របស់សហគមន៍​អន្តរជាតិ ទៅកាន់​កូរ៉េខាងជើង ហើយប្រទេស​កូរ៉េទាំងពីរ ចាំបាច់ណាស់​ត្រូវការ​ខ្សែទូរស័ព្ទបន្ទាន់​យោធា ព្រមទាំងការ​រៀបចំពិធីជួប​ជុំគ្រួសារ​កូរ៉េ ដែលបានព្រាត់ប្រាសគ្នាដោយសារ​សង្រ្គាម។

គួរបញ្ជាក់ថា បើតាម​លោកស្រី Kang Kyung-wha ខណៈកូរ៉េខាងជើង​កំពុងបង្ករឿង សហគមន៍អន្តរជាតិ​នឹងមិនអត់ឱនឱ្យ​ជាដាច់ខាត ដល់អាវុធ​នុយក្លេអ៊ែរ​កូរ៉េខាងជើង ហើយថែម​ទំាងសន្យាថា នឹងពង្រឹងកិច្ចខិតខំប្រឹងប្រែង​ផ្នែកការទូត ដើម្បីជំរុញ​ទីក្រុង​ព្យុង យ៉ាង ឱ្យត្រឡប់មករក​តុចរចាវិញ តាមរយៈការដាក់​សម្ពាធពី​គ្រប់ទិសទី៕