(ញូដេលី)៖ តុលាការពិសេសមួយនៅប្រទេសឥណ្ឌា បានសម្រេចកាត់ទោសប្រហារជីវិតអ្នកជំនួញមួយរូប រួមនិងជំនួយការម្នាក់ទៀត ដោយសារតែបានប្រព្រឹត្តសកម្មភាពរំលោភ និងសម្លាប់យ៉ាងសាហាវឃោឃៅ ទៅលើនារីជាអ្នកបម្រើវ័យ ២៥ឆ្នាំម្នាក់ នៅក្នុងលំនៅឋានរបស់ពួកគេស្ថិតក្នុងទីក្រុង Noida ក្បែររដ្ឋធានីញូដេលី កាលពីជាង ១០ឆ្នាំមុន។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃសៅរ៍ ទី០៩ ខែធ្នូ ឆ្នាំ២០១៧។
តុលាការនៃការិយាល័យស៊ើបអង្កេតមជ្ឈិម (CBI) របស់ប្រទេសឥណ្ឌា ទីផុតបានធ្វើការផ្តន្ទាទោសជាទម្ងន់ខាងលើ កាលពីថ្ងៃសុក្រម្សិលមិញ ពោលគឺមួយថ្ងៃក្រោយពីបានរកឃើញថា លោក Maninder Singh Pandher ព្រមទាំងមនុស្សជំនិតរបស់លោកម្នាក់ទៀត ឈ្មោះ Surinder Koli ពិតជាមានទោសក្នុងបទល្មើស ដែលពួកគេបានប្រព្រឹត្តនៅក្នុងផ្ទះ ស្ថិតនៅក្នុងភូមិ Nithari នៃក្រុង Noida។
នេះគឺជាសំណុំរឿងទី ៩ ក្នុងចំណោមសំណុំរឿងសរុបចំនួន ១៦ ពាក់ព័ន្ធនឹងករណីសម្លាប់មនុស្សជាបន្តបន្ទាប់គួរឲ្យរន្ធត់ ដែលបានកើតមានឡើងក្នុងភូមិ Nithari កាលពីឆ្នាំ២០០៥ និងឆ្នាំ២០០៦។ ស្របពេលដែលបុគ្គល Koli ត្រូវបានរកឃើញថា មានទោសនៅក្នុងសំណុំរឿងទី ៨ នាពេលកន្លងទៅ ហើយត្រូវបានផ្តន្ទាទោសប្រហារជីវិត បុគ្គល Pandher ត្រូវបានរកឃើញថា មានទោសក្នុងសំណុំរឿងចំនួន០៣ ហើយ ០២ក្នុងចំណោមនោះ Pandher ត្រូវទទួលទោសប្រហារជីវិត។
ជុំវិញការផ្តន្ទាទោសក្នុងសំណុំរឿងចុងក្រោយនេះ ចៅក្រមពិសេស CBI លោក Tiwari បានថ្លែងថា ជនជាប់ចោទឈ្មោះ Koli និង Pandher ពិតជាមានជាប់ពាក់ព័ន្ធក្នុងករណីរំលោភហើយសម្លាប់ លើនារីជាអ្នកបម្រើនៅតាមផ្ទះឈ្មោះ Anjali កាលពីឆ្នាំ២០០៦ ហើយពួកគេទាំងពីរ ស័ក្តិសមនឹងទទួលទោសដ៏សែនធ្ងន់បំផុត តាមតែអាចទៅរួច។
តុលាការខាងលើ បានលើកឡើងថា «ជន Koli បានអូសនារីជាជនរងគ្រោះទៅក្នុងផ្ទះ ហើយធ្វើឲ្យនាងសន្លប់ស្តូកស្តឹង រួចក៏ចាប់ផ្តើមសកម្មភាពរំលោភបំពាន និងថែមទាំងស៊ីសាច់របស់នាងទៀតផង ដូច្នេះហើយទោសប្រហារជីវិត គឺជាជម្រើសតែមួយគត់នៅក្នុងច្បាប់។ ជន Pandher ក៏មានជាប់ពាក់ព័ន្ធក្នុងបទល្មើសនេះដែរ ដោយជនទាំងពីរ នឹងត្រូវបានព្យួរករហូតដល់ដាច់ខ្យល់ស្លាប់»។
គួរជម្រាបថា នាង Anjali ដែលធ្លាប់ធ្វើការជាអ្នកបម្រើម្នាក់ ក្នុងក្រុង Noida ត្រូវគេរាយការណ៍ថា បានបាត់ខ្លួនកាលពីខែតុលា ឆ្នាំ២០០៦។ រឿងឃាតកម្មរបស់នាង បានលេចឡើងជាសាធារណៈ ក្រោយពីការចាប់ខ្លួននៃជន Koli កាលពីខែធ្នូឆ្នាំដដែល នៅពេលដែលប៉ូលិស បានរកឃើញឆ្អឹង និងលលាដ៍ក្បាលរបស់មនុស្ស ១៦នាក់ ដែលភាគច្រើនគឺជាកុមារ នៅក្បែរផ្ទះរបស់ជន Pandher៕
