(តៃប៉ិ)៖ ការនាំចេញទំនិញរបស់កោះតៃវ៉ាន់ ទៅកាន់ទីផ្សារបរទេស មានការកើនឡើងរហូតដល់ទៅ ១៤ភាគរយ កាលពីខែវិច្ឆិកាកន្លងទៅ បើប្រៀបធៀបនឹងរយៈពេលដូចគ្នា កាលពីឆ្នាំ២០១៦ ជាពិសេសគឺទៅលើផលិតផលគ្រឿងអេឡិចត្រូនិក ដែលពេលកំពុងមានតម្រូវការច្រើនបំផុត នៅមុនពេលសម្រាកដំណាច់ឆ្នាំចូលមកដល់។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀលថ្ងៃសៅរ៍ ទី០៩ ខែធ្នូ ឆ្នាំ២០១៧។
បើតាមទិន្នន័យពីរដ្ឋាភិបាលកោះតៃវ៉ាន់ ការនាំចេញទំនិញរបស់ដែនកោះ ដ៏មានសក្តានុពល ខាងផលិតកម្ម នៃគ្រឿងអេឡិចត្រូនិកនេះ បានរកចំណូលក្នុងកម្រិតខ្ពស់ថ្មីមួយទៀត គឺ ២៨.៨៨ពាន់លានអាមេរិក តែនៅក្នុងខែវិច្ឆិកា ឆ្នាំ២០១៧នេះប៉ុណ្ណោះ ហើយអត្រានេះគឺបានកើនឡើង ១៤ភាគរយ បើធៀបនឹងខែវិច្ឆិកា ឆ្នាំ២០១៦។
គួរបញ្ជាក់ថា ការសម្រេចបានលទ្ធផលខាងលើនេះ គឺធ្វើឲ្យកោះតៃវ៉ា សម្រេចបាននូវគោលដៅនាំចេញរបស់ខ្លួនសម្រាប់ឆ្នាំ២០១៧ ឲ្យបានលើសពី ៣០០ពាន់លានដុល្លារ ខណៈដែលនៅអំឡុងខែធ្នូ ឆ្នាំ២០១៧នេះ អត្រាបញ្ជាទិញទំនិញពីតៃវ៉ាន់ នៅតែមានសន្ទុះខ្ពស់ដដែល៕
(height:160)
