(សេអ៊ូល)៖ កូរ៉េខាងជើងបានទាត់ចោល ការថ្កោលទោសលើកម្មវិធីនុយក្លេអ៊ែរ និងមីស៊ីលបស់ខ្លួនពីសំណាក់សហរដ្ឋអាមេរិក ដោយថែមទំាងព្រមានចំៗថា នឹងមិនគេចចេញពី សង្រ្គាមជាមួយទីក្រុងវ៉ាស៊ីនតោនឡើយ បើទោះជាទីក្រុងព្យុងយ៉ាងមិនចង់ឱ្យសង្រ្គាមកើតឡើងក៏ដោយ។ នេះបើតាម KCNA ដកស្រង់ដោយទីភ្នាក់ងារសារព័ត៌មាន យ៉ុនហាប់ នៅល្ងាចថ្ងៃព្រហស្បតិ៍ ទី០៧ ខែធ្នូ ឆ្នាំ២០១៧។
ស្ថានីយទូរទស្សន៍រដ្ឋកូរ៉េខាងជើង KCNA ផ្អែកលើអ្នកនាំពាក្យក្រសួងការបរទេសកូរ៉េខាងជើង បានលើកឡើងយ៉ាងដូច្នេះថា «យើងមិនដែលប្រាថ្នាចង់ធ្វើសង្រ្គាមនោះទេ ប៉ុន្តែយើងនឹង មិនគេចចេញពីសង្រ្គាមជាដាច់ខាត ហើយបើសិនជាសហរដ្ឋអាមេរិក គិតខុសពីការអត់ធ្មត់របស់យើង ឬក៏ចង់ផ្សងព្រេងប្រកាសសង្រ្គាមនុយក្លេអ៊ែរ ជាមួយនឹងពួកយើង នោះយើងមាន តែស្វាគមន៍ក៏ដូចជានឹងផ្ដល់មេរៀនដ៏ជូរចត់ដល់សហរដ្ឋអាមេរិក ដោយអាវុធនុយក្លេអ៊ែរដ៏មានឥទ្ធិពលរបស់យើង»។
គួរបញ្ជាក់ថា ការព្រមានបែបនេះរបស់កូរ៉េខាងជើង កើតមានឡើងនៅចំពេលសហរដ្ឋអាមេរិក និងកូរ៉េខាងត្បូង កំពុងដឹកនាំសមយុទ្ធយោធាអាកាសទ្រង់ទ្រាយធំ នៅលើឧបទី្វបកូរ៉េ ជាមួយការចូលរួមពីយន្ដហោះចម្បាំងជាង ២៣០គ្រឿង ក្នុងនោះរួមមានទំាងយន្ដហោះទម្លាក់គ្រាប់បែកអាមេរិក B-1B និងយន្ដហោះចម្បាំងបំបាំងកាយ F-22 Raptor។ ប៉ុន្តែនេះ មិនមែនជាលើកទីមួយឡើយ ដែលកូរ៉េខាងជើងព្រមានសហរដ្ឋអាមេរិក ដោយគ្រាន់តែការព្រមានពេលនេះ ខុសប្លែកកាលពីលើកមុន ត្រង់កូរ៉េខាងជើងទើបតែប្រកាសខ្លួនឯងជារដ្ឋ នុយក្លេអ៊ែរក្រោយបាញ់សាកល្បងមីស៊ីលឆ្លងទ្វីបដោយជោគជ័យ កាលពីចុងខែវិច្ឆិកាកន្លងទៅ៕
