(កាលីហ្វ័រញ៉ា)៖ អភិបាលរដ្ឋ​កាលីហ្វ័រញ៉ា លោក ជឺរី ប្រោន (Jerry Brown) បានប្រកាស​អាសន្ននៅក្នុងតំបន់ វែថូរ៉ា ខោនធី (Ventura County) ខណៈភ្លើងឆេះ​ព្រៃចំនួនពីរ​ឈ្មោះ ថូម៉ាស់ (Thomas)  និង គ្រីក (Creek) បានបំផ្លាញផ្ទះរាប់រយ​ខ្នង និងបង្ខំឱ្យមនុស្ស​រាប់ពាន់នាក់​ ត្រូវជម្លៀសទៅកាន់​ទីទួលមាន​សុវត្ថិភាព។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន​ចិន ស៊ីនហួរ នៅរសៀលថ្ងៃពុធ ទី០៦ ខែធ្នូ ឆ្នាំ២០១៧។

ថ្លែងនៅក្នុង​សេចក្ដីប្រកាស​ព័ត៌មាន លោក Jerry Brown បានលើ​កឡើងយ៉ាងដូច្នេះថា «នេះគឺ​ជាភ្លើងឆេះព្រៃដ៏​គ្រោះថ្នាក់ និងរីករាយដាល​យ៉ាងលឿនបំផុត ប៉ុន្តែយើងនៅ​តែបន្តតស៊ូ ប្រយុទ្ធនឹង​អណ្ដាតភ្លើង ដោយប្រើប្រាស់​គ្រប់លទ្ធភាពទាំងអស់ ដែលយើងមាន»។ ដោយឡែក​ក្រុមអាជ្ញាធរ ក៏បានបញ្ជាក់​ដែរថា បច្ចុប្បន្នភ្លើងឆេះព្រៃ​កំពុងឆាបឆេះ​កាន់តែខ្លាំង ដោយសារ​ឥទ្ធិពលខ្យល់ រីឯអាកាស​ធាតុកាន់ក្ដៅ និងមានសំណើម​តិចតួច ដែលនេះអាច​នឹងបង្កគ្រោះថ្នាក់​ដល់ប្រជាជន​ក្នុងតំបន់ ស្របពេលក្រុមពន្លត់អគ្គិភ័យ​រាប់រយនាក់ បាននិងកំពុង​តស៊ូប្រយុទ្ធនឹង​អណ្ដាតភ្លើង។

គួរបញ្ជាក់ថា​ បើតាមអាជ្ញាធរអាមេរិក ភ្លើងឆេះព្រៃ​ឈ្មោះ Thomas Fire បានបំផ្លិចបំផ្លាញ​ព្រៃឈើលើផ្ទៃដី ២០,៤៣៧ហិកតា នៅក្នុងទីក្រុង សាន់តា ផូឡា (Santa Paula) នៃតំបន់ Ventura County រីឯព្រៃឈើ​លើផ្ទៃដី ៤,៤៥១ហិកតា ត្រូវបានភ្លើង​ឆេះព្រៃ Creek Fire នៅក្នុង​តំបន់ Los Angeles County លេបត្របាក់ខ្ទេចខ្ទីផងដែរ៕