(តូក្យូ)៖ វាជារឿងមិនធ្លាប់មាននោះឡើយ ដែលប្រទេសជប៉ុន​បានបង្ហាញចេតនា នៅក្នុងការទិញគ្រាប់មីស៊ីលប្រភេទថ្មី ដែលមានសមត្ថភាពវាយប្រហារ​យ៉ាងពិតប្រាកដ នោះគឺបាញ់​ឲ្យដល់ទឹកដី​កូរ៉េខាងជើងតែម្តង។ នេះបើតាមការ​ចេញផ្សាយដោយ សារព័ត៌មាន Channel News Asia ដកស្រង់ពី AFP នារសៀលថ្ងៃអង្គារ ទី០៥ ខែធ្នូ ឆ្នាំ២០១៧។

សម្រាប់គ្រាប់មីស៊ីល​ប្រភេទថ្មីខាងលើនេះ ត្រូវបានគេ​អះអាងថា ឈ្មោះ JASSM-ER។ វាជាប្រភេទ​មីស៊ីល ដែលអាចបាញ់ចេញពី​យន្តហោះចម្បាំង F-15 ជាផលិតផល​របស់​ក្រុមហ៊ុន Lockheed Marin Corp សហរដ្ឋអាមេរិក និងមានលទ្ធភាពបាញ់ពីលើអាកាស សម្តៅទៅ​លើគោលដៅលើផ្ទៃដី ​​នៅក្នុងរយៈចម្ងាយរហូតដល់ទៅ ១,០០០គីឡូម៉ែត្រ ពីគ្នាឯណោះ។

គួរបញ្ជាក់ថា ព័ត៌មានខាងលើនេះ ត្រូវបានចេញផ្សាយ​​ក្រោយពីទទួលបានប្រភពពីមន្ត្រី ដែលស្និទ្ធទៅនឹង​កិច្ចការខាងលើនេះ​ផ្ទាល់ចំនួនពីររូប ដោយពួកគេថែមទាំង​បានអះអាងទៀតថា រដ្ឋាភិបាលជប៉ុន លែងគិតគូរអំពីបញ្ហាតម្លៃទៀតឡើយ ព្រោះពេលនេះ​ការគំរាមកំហែងពី​សំណាក់​កូរ៉េខាងជើង កាន់តែខ្លាំងមែនទែន។

ក្រៅពីការត្រៀមទិញមីស៊ីល JASSM-ER ជប៉ុន ក៏កំពុងចាប់អារម្មណ៍ចង់បាន គ្រាប់មីស៊ីល​ប្រដេញ ផលិតដោយប្រទេសណ័រវេស៍ ដែលមានរយៈចម្ងាយរត់ ៥០០គីឡូម៉ែត្រ ផងដែរ​ ដែលវាមានសមត្ថភាពបាញ់ចេញពីយន្តហោះច្បាំង F-35។ សម្រាប់​គំរោង​​ទាំងពីរនេះ ក៏ស្ថិតនៅក្នុងកញ្ចប់ថវិកាជាតិជិត ៥០លានដុល្លារ ដែលក្រសួង​ការពារជាតិជប៉ុន ស្នើទៅកាន់​សភាផងដែរ។ នេះ​បើតាម​ការ​ដកស្រង់​​សេចក្តី​រាយការណ៍​ ពីទូរទស្សន៍ជប៉ុន Fuji នាដើម​សប្តាហ៍ថ្មីនេះ៕