(ម៉ូស្គូ)៖ ទីបំផុតរដ្ឋាភិបាលទីក្រុងម៉ូស្គូ បានចាប់ផ្តើមវិធានការឆ្លើយតបវិញចំពោះសហរដ្ឋ​អាមេរិក​ ដោយធ្វើដាក់បញ្ចូល​បណ្តាញផ្សព្វផ្សាយព័ត៌មានចំនួន ០៩ ទៅក្នុងបញ្ជីនៃ «ទីភ្នាក់ងារបរទេស» តាមរយៈមាត្រា៦ មានចែងនៅក្នុងច្បាស់ស្តី​ពីវិស័យសារព័ត៌មាន របស់សហព័ន្ធរុស្ស៊ី។ នេះបើតាមការ​ចេញផ្សាយដោយ សារព័ត៌មានរុស្ស៊ី Sputnik នារសៀលថ្ងៃអង្គារ៍ ទី០៥ ខែធ្នូ ឆ្នាំ២០១៧។

នៅក្នុងចំណោមបណ្តាញ​ផ្សព្វផ្សាយទាំង០៩ ខាងលើនេះភាគច្រើនគឺជារបស់អាមេរិក ដោយក្នុងនោះក៏មានសារព័ត៌មានសំឡេង​សហរដ្ឋ​អាមេរិក (VOA) ព្រមទាំងវិទ្យុ​អឺរ៉ុបសេរី (RFE/RL) ផងដែរ។ ប្រការនេះ​ត្រូវ​បានរដ្ឋាភិបាល​​​ទីក្រុងម៉ូស្គូ​អះអាងថា ជាការឆ្លើយតបវិញ​យ៉ាងសាកសម ទៅនឹងទង្វើ​របស់ទីក្រុង​វ៉ាស៊ីនតោន ដែលខ្លួនមិន​អាចទទួល​យកបាន នោះគឺការដាក់​​សម្ពាធលើ​សារព័ត៌មាន​រុស្ស៊ី Russia Today America (RT) ប្រចាំនៅ​សហរដ្ឋអាមេរិក។

សម្រាប់បញ្ជីនៃ «ទីភ្នាក់ងារបរទេស» នេះគឺប្រៀបដីដូចជា បញ្ជីខ្មៅមួយសម្រាប់ដាក់អង្គភាព​ព័ត៌មានណាមួយ ដែលបានប្រព្រឹត្តផ្ទុយនឹងច្បាស់ប្រទេសរុស្ស៊ី ហើយអង្គភាព​ដែលមានជាប់​ឈ្មោះក្នុងនេះ គឺមិនត្រូវបានអនុញ្ញាត​ឲ្យចូលទៅយកព័ត៌មាន នៅក្នុងរដ្ឋសភាជាតិ និងក្រុមប្រឹក្សាសហព័ន្ធរុស្ស៊ី ដែលជាសភាទាំងពីរជាន់​ថ្នាក់របស់​​ប្រទេសរុស្ស៊ី​នោះឡើយ។ ដោយឡែកសារព័ត៌មានដែលមិនជាប់ឈ្មោះ​នៅក្នុងបញ្ជីខាងលើនេះ គឺអាចប្រតិបត្តិការ​ទៅតាមទម្លាប់​ជាធម្មតា។

គួរបញ្ជាក់ថា ភាគច្រើននៃអង្គភាព​​ដែលបានជាប់ឈ្មោះក្នុងបញ្ជីខ្មៅ គឺជាក្រុមហ៊ុន និងសារព័ត៌មាន​របស់អាមេរិក ដែលធ្វើប្រតិបត្តិការ​ក្នុងប្រទេសរុស្ស៊ី និងផ្សព្វផ្សាយ​ព័ត៌មាន​ជាភាសារុស្ស៊ី។ អ្វីដែលគួរ​ឲ្យចាប់​អារម្មណ៍បន្ថែមទៀតនោះ គឺបណ្តាញព័ត៌មាន CNN និងសារព័ត៌មាន​របស់អាមេរិកមួយចំនួន ដែលត្រូវបានគេដឹងថា មានទំនោរិះគន់​រដ្ឋបាល លោក ដូណាល់ ត្រាំ គឺមិនមាន​ជាប់​ឈ្មោះក្នុងបញ្ជីខ្មៅ​រុស្ស៊ីនោះឡើយ៕