(ឡុងដ៍)៖ ក្រុមហ៊ុនយក្ស Google បានចាត់តាំងក្រុមការងារមួយ ដែលមាន​បុគ្គលិក​រហូតដល់ទៅ ១០,០០០នាក់ ដើម្បីតាមដានវីដេអូនានា ក្នុងបណ្តាញសង្គម Youtube ដែលមានលក្ខណៈ​ជ្រុលនិយមខ្លាំង នាំឲ្យខុសទៅនឹងលក្ខខណ្ឌកំណត់ដ៏តឹងរឹង របស់​​បណ្តាញ​សង្គម​យក្ស​ធំបំផុត​មួយ​ នៅលើ​ពិភពលោក​នេះ។ នេះបើតាម​ការចេញផ្សាយ​ដោយ Channel News Asia ដកស្រង់ពី​បណ្តាញព័ត៌មាន AFP នាព្រឹកថ្ងៃអង្គារ ទី០៥ ខែធ្នូ ឆ្នាំ២០១៧។

នាយកប្រតិបត្តិ​ខាងផ្នែកគ្រប់គ្រង ការចែករំលែកវីដេអូរបស់ Youtube លោកស្រី Susan Wokcicki បានប្រាប់​សារព័ត៌មាន Telegraph របស់អង់គ្លេស នៅថ្ងៃអង្គារនេះ​តែម្តងថា ក្រុមមនុស្សអាក្រក់ បានប្រើប្រាស់បណ្តាញ​វែបសាយរបស់យើង ក្នុងការបង្ហោះខ្សែវីដេអូនានា ដែលមានលក្ខណៈជាការ «បំភ័ន្តបន្លំ យាយីអ្នកដទៃ រំខានអារម្មណ៍ និងបង្កទុក្ខទោម្នេញ»។

ជុំវិញបញ្ហាខាងលើនេះដែរ លោកស្រីនាយករដ្ឋមន្ត្រីអង់គ្លេស Theresa May បានដាក់​សម្ពាធ​រួចទៅហើយ លើបណ្តាក្រុមហ៊ុនផ្គត់ផ្គង់សេវាអ៊ីនធើណែត​ធំៗ នៅទូទាំង​​ចក្រភពនេះ ដើម្បីបំបាត់​ក្រុមផ្សព្វផ្សាយ​បែបជ្រុលនិយមនានា ក្រោយពីបានកើតមានអំពើ​ភេរវកម្មធំៗ កន្លងមកនេះ។ កាលពី​សប្តាហ៍មុន វីដេអូស្តីពីកុមារប្រមាណជាង ១៥០,០០០ឃ្លីប ត្រូវបានដកចេញពី Youtube ក៏ព្រោះតែ​មានការ Reports និង Comments មិនល្អ (អវិជ្ជមាន) ជាច្រើនពីសំណាក់អ្នកទស្សនា ទៅលើវីដេអូទាំងនោះ។

គួរបញ្ជាក់ថា បន្ថែមពីលើការ​ជួលបុគ្គលិក ១០,០០០នាក់ខាងលើនេះ Google ក៏នឹងធ្វើការ​អភិវឌ្ឍកម្មវិធី «computer-learning» ដែលជាបច្ចេកវិទ្យាទំនើបថ្មី នឹងអាចមាន​លទ្ធភាព​ដឹង​ដោយស្វ័យប្រវត្តិ​ចំពោះវីដេអូទាំងឡាយណា ដែលត្រូវបានចាត់ថ្នាក់ថា «ខុសនឹងក្រិត្សក្រម Youtube» ជាពិសេស​នោះ គឺវីដេអូដែលមានផ្តល់ប៉ះពាល់​ដល់កុមារ​ជាចម្បង៕