(ញូយ៉ក)៖ ក្រុមមន្ត្រីនៃ​ក្រុមប្រឹក្សាសន្តិសុខ នៃអង្គការសហប្រជាជាតិ (UNSC) ​នឹងជួបប្រជុំគ្នា​នៅ​ថ្ងៃទី១៥ ខែធ្នូ ខាងមុខនេះ ដើម្បីពិភាក្សាគ្នា​លើសំណុំរឿង​នុយក្លេអ៊ែរ និងមីស៊ីល​កូរ៉េខាងជើង ហើយពួកគេក៏​ត្រូវនឹងជួប​ ក្នុងកិច្ចប្រជុំដាច់​ដោយឡែក​មួយ​ទៀតផងដែរ សម្រាប់កិច្ច​ពិភាក្សាស្ដីពី​ការរំលោភ​បំពានសិទ្ធិមនុស្ស​នៅកូរ៉េខាងជើង ជាកិច្ចប្រជុំ​ប្រចាំឆ្នាំមួយ​ដែលចិនតែង តែព្យាយាមរារាំង​កាលពី​បីឆ្នាំមុន។ នេះបើតាមការ​ចេញផ្សាយ ទីភ្នាក់ងារសារ​ព័ត៌មាន Reuters នៅ​ថ្ងៃសៅរ៍ ទី០២ ខែធ្នូ ឆ្នាំ២០១៧។

យោងតាម​អគ្គរដ្ឋទូត​ជប៉ុន លោក Koro Bessho​ ដែលជាប្រធាន​សមាជិកទំាង ១៥ នៃក្រុមប្រឹក្សា​សន្តិសុខ​នៅខែធ្នូនេះ ក្រុមរដ្ឋមន្ត្រីជា​ច្រើនរូបត្រូវ​បានអះអាងថា នឹងចូលរួម​នៅក្នុង​កិច្ចប្រជុំ​នៅថ្ងៃទី១៥ ខែធ្នូដោយផ្ដោត​សំខាន់លើ​សំណុំរឿង​នុយក្លេអ៊ែរ និងមីស៊ីល​កូរ៉េខាងជើង ព្រមទាំងបញ្ហា​សិទ្ធិមនុស្ស​នៅកូរ៉េខាងជើង ដែលប្រព្រឹត្តទៅនៅ​ថ្ងៃទី១១ ខែធ្នូ។

ដោយឡែកជុំវិញ​កិច្ចប្រជុំ​នេះដែរ ចិនបានបរាជ័យ​បីលើករួចមក​ហើយ​ ក្នុងការព្យាយាមកិច្ច​ប្រជុំស្ដីពីសិទ្ធិមនុស្ស​កាលពី​ពេលមុនៗ ដ្បិតដើម្បី​ធ្វើដូច្នោះ​គេត្រូវការសំឡេង​គាំទ្រ​យ៉ាងហោច ណាស់ ០៩សំឡេង ក្នុងចំណោម​សមាជិកទំាង ១៥ នៃក្រុមប្រឹក្សាសន្តិសុខ ខណៈចិន រុស្ស៊ី សហរដ្ឋអាមេរិក អង់គ្លេស និងបារាំងមិនអាច​ប្រើសិទ្ធិ​វេតូឡើយ។

គួរបញ្ជាក់ថា កិច្ចប្រជុំក្នុងឆ្នាំនេះ​ទទួលបានការគាំទ្រពីសមាជិកចំនួន ០៩ ក្នុងនោះមាន សហរដ្ឋអាមេរិក បារាំង អង់គ្លេស អ៊ីតាលី ជប៉ុន សេណេហ្គាល់ ស៊ុយអែត អ៊ុយក្រែន និងអុយរ៉ាហ្គាយ៕