(ញូដេលី)៖ ព្យុះស៊ីក្លូនដ៏​កំណាចមួយ បានវាយប្រហាររដ្ឋ Tamil Nadu និងរដ្ឋ Kerela ភាគខាងត្បូង​ប្រទេសឥណ្ឌា នៅថ្ងៃសុក្រនេះ​តែម្តង បានឆក់យក​ជីវិតមនុស្ស ០៨នាក់ និងជាង ១០០នាក់ទៀត​បាត់ខ្លួន។ នេះបើតាមការ​ចេញផ្សាយដោយ ទីភ្នាក់ងារ​ព័ត៌មានចិន ស៊ីនហួរ នារសៀល​ថ្ងៃសុក្រ ទី០១ ខែធ្នូ ឆ្នាំ២០១៧។

ព្យុះស៊ីក្លូន Ockhi កំពុងតែឆ្ពោះ​ទៅកាន់តំបន់​ប្រជុំកោះ Lakshadweep ក្បែរតំបន់​ភាគខាងត្បូង​ នៃប្រទេស​ឥណ្ឌា។ ផ្នែកព្យាករណ៍​ឧតុនិយម​របស់ឥណ្ឌា ប្រចាំរដ្ឋ Kerela បាន​អះអាងថា ព្យុះស៊ីក្លូន Ockhi បាន និងកំពុងបង្ក​ជាភ្លៀងធ្លាក់​យ៉ាងសន្ធប់ និងខ្យល់​បោកបក់​ខ្លាំង នៅក្នុងរដ្ឋ Tamil Nadu, Kerela និង ប្រជុំកោះ Lakshadweep ភាគខាងត្បូង ទល់មុខមហាសមុទ្រ​ឥណ្ឌានោះ​តែម្តង។

គួរបញ្ជាក់ថា សម្រាប់មនុស្សស្លាប់ និងបាត់ខ្លួនមាន​ចំនួនច្រើនជាងគេ នៅក្នុងស្រុក Kanyakumari និង Thoothukudi នៃរដ្ឋ Tamil Nadu ហើយអាជ្ញាធរ​អះអាងថា គ្រោះធម្មជាតិ​ដ៏អាក្រក់នេះ នឹងបន្ត​រយៈពេល ១២ម៉ោងទៀត រហូតដល់យប់​ថ្ងៃសុក្រនេះ។ អាជ្ញាធរឥណ្ឌា​ក៏បានត្រៀមទូក និងរថយន្តសង្គ្រោះ​ផងដែរ ទៅកាន់តំបន់​ដែលរងគ្រោះខ្លាំង៕