​(វ៉ាស៊ីនតោន)៖ សេតវិមាន​បានចេញមុខទាត់​ចោល សេចក្ដីរាយការណ៍មួយ​ដែលថា លោក រិច ធីល្លឺសុន នឹងត្រូវបណ្ដេញចេញពីតំណែង​ជារដ្ឋមន្ត្រីការបរទេស​អាមេរិក ក្រោយពីការបែក​ធ្លាយព័ត៌មានកន្លងមកថា លោកមានភាពរកាំរកូសខ្លាំងជាមួយ​ លោក ដូណាល់ ត្រាំ និងជំនួសមកវិញនូវលោក Mike Pompeo។ នេះបើតាម ការចេញផ្សាយ​ដោយ​សារព័ត៌មាន BBC នៅព្រឹកថ្ងៃសុក្រ ទី០១ ខែធ្នូ ឆ្នាំ២០១៧។

ថ្លែងនៅក្នុងសន្និសីទ​សារព័ត៌មាន​ដ៏ខ្លីមួយ អ្នកនាំពាក្យ​សេតវិមាន លោកស្រី Sarah Sanders បានគូសបញ្ជាក់យ៉ាងដូច្នេះថា «លោក រិច ធីល្លឺសុន នឹងបន្តដឹកនាំ​ក្រសួង​ការបរទេស​អាមេរិក ហើយព័ត៌មាន​ដែលថា រូបលោកនឹងត្រូវ​ដកដំណែង​ គឺជារឿងមិនពិត»។ ប៉ុន្តែទន្ទឹម​គ្នានោះ លោកស្រី Sanders បានបន្តទៀតថា នៅពេលលោក​ប្រធានាធិបតី ដូណាល់ ត្រាំ បាត់បង់​ការជឿទុកចិត្ត​លើនរណាម្នាក់ នោះពួកគេមិន​អាចបន្តកាន់តំណែង​បានទៀត​នោះទេ។

គួរបញ្ជាក់ថា ប្រតិកម្មរបស់​សេតវិមាន​ បានកើតមានឡើង​បន្ទាប់ពី​សារព័ត៌មាន New York Times និងសារព័ត៌មានធំៗមួយចំនួនទៀត ផ្អែកលើមន្ត្រី​ជាន់ខ្ពស់អាមេរិក​ម្នាក់បានចេញផ្សាយថា លោក រិច ធីល្លឺសុន នឹងត្រូវបណ្ដេញចេញពីតំណែង និងជំនួសមកវិញដោយ​នាយកទីភ្នាក់ងារ​ស៊ើបការណ៍សំងាត់​អាមេរិក CIA លោក Mike Pompeo។ យ៉ាងណាក៏​ដោយមួយ​រយៈពេលចុង​ក្រោយនេះ គេសង្កេត​ឃើញ លោក ធីល្លឺសុន និងលោក ត្រាំ ពិតជាមាន​ការខ្វែងគំនិត​ជាច្រើន ទាក់ទិននឹង​នយោបាយការ​បរទេស​ ជាពិសេសគឺ​សំណុំរឿង​កូរ៉េខាងជើង ហើយពាក្យចចាមអារ៉ាម​ថា លោក ធីល្លឺសុន នឹងលាលែង​ពីតំណែងក៏ធ្លាប់​កើតមាន​ផងដែរ៕