(ញូយ៉ក)៖ ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Nikki Haley បានលើកឡើងថា ទីក្រុងវ៉ាស៊ីនតោនបានស្នើឲ្យទីក្រុងប៉េកាំងផ្អាកការដឹកជញ្ជូនប្រេងឆៅ ទៅកាន់ប្រទេសកូរ៉េខាងជើងជាបន្ទាន់ ក្រោយពីទីក្រុងព្យុងយ៉ាង បានបង្ករឿងសាជាថ្មីម្តងទៀត តាមរយៈការធ្វើតេស្តមីស៊ីលផ្លោងឆ្លងទ្វីបជំនាន់ថ្មី ដែលត្រូវបានអះអាងថា អាចវាយប្រហារលើគ្រប់ទីតាំង នៅទូទាំងសហរដ្ឋអាមេរិក។ នេះបើតាមការដកស្រង់ការផ្សាយចេញពីសារព័ត៌មាន CNBC នៅយប់ថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០១៧។
ក្នុងអំឡុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ នៅទីស្នាក់ការ UN ក្នុងទីក្រុងញូយ៉ក ជុំវិញការបាញ់ធ្វើតេស្តមីស៊ីលរបស់កូរ៉េខាងជើង នាសប្តាហ៍នេះ លោកស្រី Haley បានបង្ហើបឲ្យដឹងថា ប្រធានាធិបតីអាមេរិក លោក ដូណាល់ ត្រាំ បានសន្ទនាតាមទូរស័ព្ទជាមួយប្រធានាធិបតីចិន លោក ស៊ី ជិនពីង និងបានប្រាប់ទៅលោក ស៊ី ថា វាដល់ពេលហើយដែលចិន ត្រូវបានបញ្ឈប់រាល់សកម្មភាពដឹកជញ្ជូនប្រេងឆៅ ទៅឲ្យប្រទេសជិតខាងរបស់ខ្លួនមួយនេះ។
នាឱកាសនោះ លោកស្រី Haley បានថ្លែងដូច្នេះថា «ខណៈពេលនេះ យើងសង្ឃឹមថាប្រធានាធិបតី ស៊ី ក៏នឹងមានគោលជំហរដូចគ្នាផងដែរ។ ពួកយើងជឿជាក់ថាលោក មានឱកាសក្នុងការធ្វើរឿងដែលត្រឹមត្រូវ សម្រាប់ផលប្រយោជន៍នៃប្រទេសនានា។ ចិនត្រូវតែបង្ហាញភាពជាអ្នកដឹកនាំហើយធ្វើឲ្យបាន។ ប្រទេសចិន អាចធ្វើរឿងនេះបានដោយខ្លួនឯង ឬបើមិនដូច្នោះទេ ពួកយើងអាចចាត់ការបញ្ហាដឹកជញ្ជូនប្រេងនេះដោយផ្ទាល់ដៃ»។
គួររំលឹកថា បើតាមរដ្ឋបាលព័ត៌មានថាមពល(EIA) របស់អាមេរិក កាលពីខែកញ្ញា ចិនបានប្រកាសថា ខ្លួននឹងបន្ថយការដឹកជញ្ជូនផលិតផលប្រេងចម្រាញ់រួច ទៅកាន់កូរ៉េខាងជើង ឲ្យនៅត្រឹម០២លានបារ៉ែលក្នុងមួយឆ្នាំ ខណៈកាលពីឆ្នាំទៅមុន ប្រទេសចិនបានបញ្ជូនផលិតផលប្រេងចំនួន៦,០០០បារ៉ែលក្នុងមួយថ្ងៃ ទៅឲ្យកូរ៉េខាងជើង ដើម្បីរក្សាដំណើរការនៃវិស័យកសិកម្ម ដឹកជញ្ជូន និងយោធារបស់ប្រទេសកុម្មុយនិស្តឯកោមួយនេះ។ យ៉ាងណាមិញ ចិននៅតែបន្តដឹកជញ្ជូនទៅកាន់កូរ៉េខាងជើងនូវ ប្រេងឆៅ ដែលជាវត្ថុធាតុដើមសម្រាប់ប្រេងឥន្ទនៈ និងជាកម្លាំងចលករដ៏សំខាន់ នៃកម្មវិធីនុយក្លេអ៊ែរ-មីស៊ីលរបស់របបដឹកនាំទីក្រុងព្យុងយ៉ាង៕
