(បាងកក)៖ អតីតអគ្គលេខាធិការ​នៃសមាគមអាស៊ាន លោក Surin Pitsuwan បានទទួលមរណភាព​ហើយ ក្នុងអាយុ ៦៨ឆ្នាំ ដោយសារតែអការៈគាំងបេះដូងភ្លាមៗ នៅមុនពេលលោកត្រៀម​ឡើងថ្លែង​សុន្ទរកថាមួយ នៅរសៀលថ្ងៃព្រហស្បតិ៍នេះ​តែម្តង សម្រាប់កិច្ចប្រជុំសភា Halal (សាសនាអ៊ីស្លាម) នៅក្នុង​សណ្ឋាគារ Bitec នៃសង្កាត់បាងណា ទីក្រុងបាងកកប្រទេសថៃ។ នេះបើតាម​ការចេញផ្សាយ​ដោយ សារព័ត៌មាន​បាងកកប៉ុស្តិ៍ នាល្ងាច​ថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០១៧។

ព័ត៌មានបានបន្តទៀតថា ក្រោយពេលលោកទទួលអការៈគាំងបេះដូងភ្លាមៗ​បែបនេះ រថយន្តសង្គ្រោះ​បន្ទាន់បាននាំ​រូបលោក ទៅកាន់មន្ទីរពេទ្យ Ramkhamhaeng ក្នុងទីក្រុងបាងកក ប៉ុន្តែមិនបាន​ប៉ុន្មានម៉ោងផង ក្រុមគ្រូពេទ្យបាន​អះអាងថា លោក Surin Pitsuwan បានទទួលមរណភាពបាត់ទៅហើយ។

សម្រាប់ជីវៈប្រវត្តិសង្ខេប គឺលោក Surin Pitsuwan កើតនៅ​ថ្ងៃទី២៨ ខែតុលា ឆ្នាំ១៩៤៩ នៅក្នុងស្រុក Muang នៃខេត្ត Nakhon Si Thammarat។ លោកបានបញ្ចប់​​ការ​សិក្សានៅ​សាលា Claremont ក្នុងរដ្ឋ​​កាលីហ្វរញ៉ា សហរដ្ឋអាមេរិក លើមុខវិជ្ជវិទ្យាសាស្ត្រ​​នយោបាយ កាលពីឆ្នាំ១៩៧២ និងបញ្ចប់បរិញ្ញាបត្រ​ជាន់ខ្ពស់ នៅឯសាកល​វិទ្យាល័យ Harvard ថែមទៀតផង។ ជាងនេះ​ទៅ​ទៀត លោកបានប្រឡូកចូល​ឆាកនយោបាយ កាលពីឆ្នាំ១៩៨៦ ក្នុងនាមជាបេក្ខជន​​តំណាងរាស្ត្រ នៃគណបក្ស​ប្រជាធិបតេយ្យ ហើយក៏ទទួល​បានអាសនៈ​ប្រចាំខេត្ត​​របស់​លោក​តែម្តង ពីឆ្នាំ១៩៨៦ ដល់ឆ្នាំ២០០៥។

ជីវិតនយោបាយ​របស់លោក បានទទួលភាពជោគជ័យ​ច្រើន ខណៈតំណែងសំខាន់ៗ លោកធ្លាប់បាន​កាន់កាប់ ដូចជាអនុរដ្ឋមន្ត្រី​ការបរទេសថៃ​ពីឆ្នាំ១៩៩២ ដល់ឆ្នាំ១៩៩៥ និងក្លាយជារដ្ឋមន្ត្រី​ការបរទេសតែម្តង​នៅឆ្នាំ១៩៩៧ ដល់ឆ្នាំ២០០១ ក្រោម​របបដឹកនាំ​របស់អតីត​នាយករដ្ឋមន្ត្រី Chuan Leekpai។

អ្វីដ៏គួរឲ្យចាប់​អារម្មណ៍ពី លោក Surin Pitsuwan គឺលោកជាជនជាតិ​ថៃដំបូងបំផុត ដែលបានក្លាយ​ជាអគ្គលេខាធិការ​អាស៊ាន នៅក្នុងទីក្រុង​ហ្សាការតាប្រទេស​ឥណ្ឌូណេស៊ី កាលពីឆ្នាំ២០០៨ ដែលមាន​អាណត្តិ ០៥ឆ្នាំ ហើយក្រោយមក​ទើបលោកវិល​មកចូលរួម​ជាមួយបក្សប្រជាធិបតេយ្យ​ម្តងទៀត។

គួរបញ្ជាក់ថា ពិធីបុណ្យសពរបស់លោក នឹងត្រូវប្រារព្ធឡើងនៅទីលាន Tha It ក្នុងស្រុក Pak Kret នៃខេត្ត Nonthaburi នៅថ្ងៃសុក្រស្អែកនេះតែម្តង៕