(វ៉ាស៊ីនតោន)៖ ការស្ទង់មតិមួយបានបង្ហាញថាប្រជាជនអាមេរិកវ័យជំទង់ជាង ៧១ភាគរយយល់ថា សហរដ្ឋអាមេរិកចាំបាច់ត្រូវការគណបក្សនយោបាយដ៏ធំទី ៣ ដោយសារតែ គណបក្សសាធារណៈរដ្ឋ និងគណបក្សប្រជាធិបតេយ្យធ្វើការងារមិនបានល្អ។ នេះបើតាមការចេញផ្សាយដោយ ទីភ្នាក់ងារសារព័ត៌មានចិន ស៊ីនហួរ នៅព្រឹកថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០១៧។
យោងតាមការស្ទង់មតិចេញផ្សាយដោយ NBC News និង GenForward កាលពីថ្ងៃពុធ ប្រជាជនអាមេរិកវ័យជំទង់ ៦៣ភាគរយ បានសម្ដែងការមិនពេញចិត្ត លើការបំពេញការងារ ជាប្រធានាធិបតីរបស់ លោក ដូណាល់ ត្រាំ ខណៈ៦៥ភាគរយគិតថា សហរដ្ឋអាមេរិកកំពុងដើរលើផ្លូវខុស។ ជាងនេះទៅទៀត ក្រុមមនុស្សវ័យក្មេងទំាងនេះ ០៦នាក់ ក្នុងចំណោម ១០នាក់ ក៏បានសម្ដែងការជំទាស់ផងដែរ ចំពោះរបៀបធ្វើការងាររបស់សភាអាមេរិក រីឯ ៥៩ភាគរយ មិនពេញចិត្តនឹងគណបក្សសាធារណៈរដ្ឋ និង៤២ភាគរយ មិនពេញចិត្តគណបក្សប្រជាធិបតេយ្យ។
គួរបញ្ជាក់ថា ការស្ទង់មតិខាងលើ ត្រូវបានធ្វើឡើងពីថ្ងៃទី២៦ ដល់ថ្ងៃទី១០ ខែវិច្ឆិកា តាមរយៈការសាកសួរប្រជាជនអាមេរិក ១,៨៧៦នាក់ មានអាយុចន្លោះពី១៨ ដល់ ៣៤ឆ្នាំ ហើយ អត្រាកំហុសនៃការស្ទង់មតិមាន ៣.៩២ភាគរយ។ ការស្ទង់មតិថ្មីនេះ គឺជារឿងដ៏គួរឲ្យចាប់អារម្មណ៍ខ្លាំងនៅសហរដ្ឋអាមេរិក ខណៈដែលលោក ដូណាល់ ត្រាំ ហាក់ដូចជាបានបង្កការមិនពេញចិត្តពីសំណាក់ប្រជាពលរដ្ឋអាមេរិក កាន់តែកើនឡើងខ្ពស់ ទៅលើរបៀបរបបនៃការដឹកនាំរដ្ឋបាលរបស់លោក ចាប់តាំងពីការឡើងកាន់តំណែងជាផ្លូវការ កាលពីថ្ងៃទី២០ ខែមករា ឆ្នាំ២០១៧មក៕
