(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានប្រាប់នាយករដ្ឋមន្ត្រីអង់គ្លេស លោកស្រី Theresa May ឱ្យផ្ដោតសំខាន់លើពួកភេរវករនៅក្នុងចក្រភពអង់គ្លេស បន្ទាប់ ពីលោកស្រីបានរិះគន់រូបលោកសម្រាប់ការចែករំលែកវីដេអូប្រឆាំងនឹង អ្នកកាន់សាសនាអ៊ីស្លាម នៅលើបណ្ដាញ Twitter របស់លោកកាលពីថ្ងៃពុធ។ នេះបើតាមការចេញផ្សាយដោយ សារព័ត៌មាន BBC នៅព្រឹកថ្ងៃព្រហស្បតិ៍ ទី៣០ ខែវិច្ឆិកា ឆ្នាំ២០១៧។
ថ្លែងនៅលើ Twitters លោក ដូណាល់ ត្រាំ បានលើកឡើងយ៉ាងដូច្នេះថា «កុំផ្ដោតសំខាន់លើខ្ញុំ តែអ្នកគួរតែផ្ដោតសំខាន់លើការកម្ទេច ពួកភេរវករជ្រុលនិយមដែលកំពុង ធ្វើសកម្មភាពនៅក្នុងចក្រភពអង់គ្លេស»។ ភាពចម្រូងចម្រាសបានផ្ទុះឡើង កាលពីថ្ងៃពុធ ម្សិលមិញក្រោយលោក ដូណាល់ ត្រាំ បានចែករំលែកបន្តដល់ទៅបីដងនូវវីដេអូប្រឆាំង អ្នកកាន់សាសនាអ៊ីស្លាម បង្ហោះដំបូងដោយអ្នកនយោបាយស្ដាំនិយមជ្រុលអង់គ្លេសម្នាក់ គឺលោកស្រី Jayda Fransen នៅលើ Twitter របស់លោកដែលមានតាមដានជាង ៤០លាននាក់។
ប៉ុន្តែទន្ទឹមគ្នានោះដែរ អ្នកនាំពាក្យនាយករដ្ឋមន្រ្តីអង់គ្លេសបាននិយាយថា ការធ្វើបែបនេះរបស់លោក ដូណាល់ ត្រាំ គឺជាកំហុសឆ្គងមួយ ខណៈលោកស្រី Fransen កំពុងព្យាយាមបំបែកបំបាក់សហគមន៍នានា តាមរយៈការញុះញង់បង្កភាពស្អប់ខ្ពើមពោរពេញដោយការបោកប្រាស់ និងបង្កជាភាពតានតឹង»។
គួរបញ្ជាក់ថា លោកស្រី Fransen ត្រូវបានគេចោទប្រកាន់នៅក្នុងចក្រភពអង់គ្លេសថា បានប្រើប្រាស់ការគំរាមកំហែង ការរំលោភបំពាន និងការប្រមាថមើលងាយជាមួយនឹងពាក្យពេចន៍ តាមរយៈវីដេអូ ដែលលោកស្រីបានបង្ហោះបង្ហាញពីសកម្មភាពជនអន្តោប្រវេសន៍មូស្លីមម្នាក់ វាយប្រហារលើបុរសម្នាក់ជាអ្នកកាន់សាសនាគ្រិស្ដ៕
