(រីយ៉ាដ)៖ ព្រះអង្គម្ចាស់អារ៉ាប៊ីសាអូឌីត Miteb bin Abdullah ដែលស្ថិតនៅក្នុងចំណោមអ្នកជាប់ឃុំ ក្នុងសណ្ឋាគារផ្កាយប្រាំ Ritz-Carlton ក្នុងទីក្រុងរីយ៉ាដ ពីបទពុករលួយត្រូវបាន អនុញាតឱ្យនៅក្រៅឃុំ បន្ទាប់ពីបានយល់ព្រមទទួលយកការផ្សះផ្សា ជាមួយអាជ្ញាធរអារ៉ាប៊ីសាអូឌីត។ នេះបើតាមការចេញផ្សាយដោយ សារព័ត៌មាន Sputnik នៅរសៀលថ្ងៃពុធ ទី២៩ ខែវិច្ឆិកា ឆ្នាំ២០១៧។
យោងតាមអាជ្ញាធរអារ៉ាប៊ីសាអូឌីត ព្រះអង្គម្ចាស់ Miteb bin Abdullah មានព្រះជន្ម ៦៥វស្សា បានយល់ព្រមបង់ប្រាក់ជាង ០១ពាន់លានដុល្លារ និងព្រមទទួលយកការចោទប្រកាន់ពី បទពុករលួយ ដើម្បីជាថ្នូរនឹងការដោះលែងឱ្យមានសេរីភាព។ ប៉ុន្តែពុំមានព័ត៌មានជាក់លាក់ណាមួយបញ្ជាក់ថា ព្រះអង្គត្រូវបានគេដោះលែង ឬបញ្ជូនទៅកាន់កន្លែងផ្សេងទៀត ឬក៏កំពុងជាប់ឃុំនៅក្នុងផ្ទះ ឬក៏យ៉ាងណានោះទេ ខណៈមនុស្ស ០៣នាក់ ផ្សេងទៀតក៏ត្រូវគេជឿជាក់ថា អាចនឹងត្រូវបានដោះលែងផងដែរ។
គួរបញ្ជាក់ថា ព្រះអង្គម្ចាស់ Miteb bin Abdullah គឺជាបុត្រាមួយអង្គនៃអតីតស្ដេច Abdullah ហើយក៏ជាបេក្ខជនដែលធ្លាប់ត្រូវបានគេរំពឹងខ្ពស់ថា អាចនឹងគ្រងរាជ្យជាសេ្ដចអារ៉ាប៊ីសាអូឌីត។ ព្រះអង្គម្ចាស់រូបនេះ រួមទាំងរដ្ឋមន្ត្រី មហាសេដ្ឋី និងព្រះអង្គម្ចាស់ជាច្រើនអង្គ ត្រូវបានអាជ្ញាធរចាប់ខ្លួន នៅក្នុងក្របខ័ណ្ឌនៃយុទ្ធនាការកម្ចាត់អំពើពុករលួយ ដឹកនាំដោយ ព្រះអង្គម្ចាស់រាជទាយាទ Mohammed bin Salman កាលពីដើមខែវិច្ឆិកាកន្លងទៅ ដែលគេមើលឃើញថា គឺជាយុទ្ធសាស្ត្រមួយរបស់ព្រះអង្គ ក្នុងការពង្រឹងអំណាចមុននឹងឡើង សោយរាជ្យ៕
