(ញូយ៉ក)៖ ក្រុមប្រឹក្សាសន្តិសុខអង្គការសហប្រជាជាតិ (UNSC) នឹងបើកកិច្ចប្រជុំជាបន្ទាន់មួយ នៅរសៀលថ្ងៃពុធសប្តាហ៍នេះ (ត្រូវនឹងព្រឹកថ្ងៃព្រហស្បតិ៍ ម៉ោងក្នុងទីក្រុងញូយ៉ក) ដើម្បីពិភាក្សាលើវិធានការឆ្លើយតបនឹងការបាញ់ សាកល្បងមីស៊ីលលើកចុងក្រោយ របស់កូរ៉េខាងជើងនៅព្រឹកពុធនេះតែម្តង។ កិច្ចប្រជុំនេះនឹងត្រូវធ្វើឡើង តបតាមសំណើពីសហរដ្ឋអាមេរិក កូរ៉េខាងត្បូង និងជប៉ុន។ នេះបើតាមការចេញផ្សាយដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃពុធ ទី២៩ ខែវិច្ឆិកា ឆ្នាំ២០១៧។
កូរ៉េខាងជើងបានបាញ់មីស៊ីលឆ្លងទ្វីប ICBM Hwasong-15 មួយគ្រាប់នៅព្រឹកថ្ងៃពុធនេះ បន្ទាប់ពីបានផ្អាកការធ្វើតេស្ដ អស់រយៈពេល ៧៥ថ្ងៃមកនេះ។ យោងតាមយោធាជប៉ុន មីស៊ីលដែលកូរ៉េខាងជើងត្រូវបានបាញ់ កាលពីវេលាម៉ោងប្រមាណ ០៣៖១៨នាទី (ពេលវេលានៅឧបទ្វីបកូរ៉េ) ចេញពីតំបន់ Pyongsong នៃខេត្ត Pyongan ខាងត្បូង ដោយវាហោះបានរយៈពេលប្រហែល ៥៣នាទីនៅរយៈកម្ពស់ ៤,៥០០គីឡូម៉ែត្រ និងហោះបានចំងាយ ៩៦០គីឡូម៉ែត្រ មុននឹងធ្លាក់ចូលក្នុងតំបន់សេដ្ឋកិច្ចផ្ដាច់ជប៉ុននៅឯសមុទ្រខាងកើតឬសមុទ្រ ជប៉ុន។
ប៉ុន្តែភ្លាមៗនោះដែរ កូរ៉េខាងត្បូង ជប៉ុន និងសហរដ្ឋអាមេរិក បានស្នើឱ្យបើកកិច្ចប្រជុំជាបន្ទាន់មួយ នៅឯក្រុមប្រឹក្សាសន្តិសុខ នៃអង្គការសហប្រជាជាតិ។ «ក្រុមប្រឹក្សាសន្តិសុខ នៃអង្គការសហប្រជាជាតិ នឹងកោះប្រជុំជាបន្ទាន់នៅរសៀលថ្ងៃពុធនេះ»។ នេះបើតាមប្រភពការទូតជាច្រើន ប្រចាំអង្គការសហប្រជាជាតិ។
គួរបញ្ជាក់ថា កាលពីខែកក្កដា កូរ៉េខាងជើងបានធ្វើតេស្ដមីស៊ីលឆ្លងទ្វីប ICBM Hwasong-14 ចំនួនពីរលើក ប៉ុន្តែនៅថ្ងៃនេះទីក្រុងព្យុងយ៉ាងបានប្រកាសថា ខ្លួនបានធ្វើតស្ដដោយ ជោគជ័យនូវមីស៊ីលឆ្លងទ្វីបប្រភេទថ្មីមួយឈ្មោះ ICBM Hwasong-15 ដែលអាចពាំក្បាលគ្រាប់នុយក្លេអ៊ែរបាញ់ដល់គ្រប់ទីកន្លែង និងគ្រប់ទីតាំងទំាងអស់ នៃដីគោករបស់សហរដ្ឋអាមេរិក៕
