(សេអ៊ូល)៖ កូរ៉េខាងជើង​បានប្រកាស​ហើយ​ ពីភាពជោគជ័យ​នៃការបាញ់សាកល្បង​ មីស៊ីលផ្លោង​ឆ្លងទ្វីប ICBM ដែលកូរ៉េខាងជើងឲ្យឈ្មោះថា Hwasong-15 របស់ខ្លួន​ ហើយនេះគឺជាការធ្វើ​តេស្ដលើក​ទី៣ នៃ​មីស៊ីលឆ្លងទ្វីប រាប់ចាប់តាំងពី​ខែកក្កដាមក ហើយទីក្រុងព្យុងយ៉ាងអះអាងក្តែងៗនៅថ្ងៃពុធនេះថា វា​មានសមត្ថភាព​បាញ់​ដល់គ្រប់ទីតាំងទាំងអស់ នៅលើទឹកដីសហរដ្ឋអាមេរិកទាំងមូល ជាពិសេសរដ្ឋធានីវ៉ាស៊ីនតោន។ ព្រមពេល​ជាមួយគ្នា ក្រុមអ្នកជំនាញ​ក៏យល់ដែរថា ទីក្រុងព្យុងយ៉ាង​កាន់តែដើរ​ជិតដល់បច្ចេកវិទ្យា​មីស៊ីលឆ្លងទ្វីបពិតប្រាកដ ហើយគេអាច​នឹងធ្វើតេស្ដ​កាន់តែច្រើន នៅប៉ុន្មានខែ​ខាងមុខ​នេះ។ នេះបើតាម​ការចេញផ្សាយ​ដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃពុធ ទី២៩ ខែវិច្ឆិកា ឆ្នាំ២០១៧។

ការប្រកាស​ជោគជ័យខាងលើនេះ​​របស់​កូរ៉េខាងជើង កើតមានឡើងតែ​ប៉ុន្មានម៉ោងប៉ុណ្ណោះ បន្ទាប់ពីយោធា​អាមេរិក និងកូរ៉េខាងត្បូង​អះអាងថា ទីក្រុងព្យុងយ៉ាងបានបាញ់សាកល្បង​មីស៊ីលមួយគ្រាប់​ (ទំនងជាមីស៊ីល ឆ្លងទ្វីប ICBM) នៅព្រឹកថ្ងៃពុធនេះ​ ទៅធ្លាក់នៅតំបន់​សេដ្ឋកិច្ចផ្ដាច់មុខ​របស់ជប៉ុន នៅឯសមុទ្រខាងកើត។ ជាមួយគ្នា​នោះដែរ បើតាម​រដ្ឋាភិបាល​​ជប៉ុន កូរ៉េខាងជើង​បានបាញ់មីស៊ីល​មួយគ្រាប់ កាលពីវេលា​ម៉ោង​ប្រមាណ ០៣៖១៨នាទី​ព្រឹកថ្ងៃ​ពុធ​នេះ (ពេលវេលា​នៅ​ឧបទ្វីបកូរ៉េ) ហើយគ្រាប់​មីស៊ីល​នោះ ហោះបាន​រយៈពេល​ប្រហែល ៥៣នាទី និងទំនងជាបាន​ធ្លាក់ចូលទៅ​ក្នុងតំបន់​សេដ្ឋកិច្ចផ្តាច់មុខ​របស់ជប៉ុន។

ក្រសួងការពារជាតិជប៉ុន បានអះអាងថា មីស៊ីលរបស់​កូរ៉េខាងជើង បានបំបែកកំណត់ត្រា​ ដោយ​ហោះ​ឡើងដល់រយៈកម្ពស់ ៤,៥០០គីឡូម៉ែត្រ ក្នុងរង្វាស់មុំយ៉ាង​ចោត និងហាក់ដូចជាប្រភេទ​មីស៊ីលផ្លោង​ឆ្លងទ្វីប ICBM។

គួរបញ្ជាក់ថា ការបាញ់សាកល្បង​មីស៊ីលនេះ គឺជាលើកដំបូង​គិតចាប់តាំងពីពាក់កណ្ដាល​ខែកញ្ញាមក មិនតែប៉ុណ្ណោះវាបាន​កើតឡើងតែមួយ​សប្ដាហ៍ ក្រោយទីក្រុងវ៉ាស៊ីនតោន បាន បញ្ចូលកូរ៉េខាងជើងជាថ្មីម្ដងទៀត ទៅក្នុង​បញ្ជីខ្មៅនៃរដ្ឋគំាទ្រភេរវករ និងក្រោយរដ្ឋមន្ត្រី​ក្រសួងបង្រួបបង្រួមជាតិ​កូរ៉េខាងត្បូង បានព្យាករណ៍ថា ទីក្រុងព្យុងយ៉ាង​អាចនឹងប្រកាស​ពីភាពជោគ ជ័យទាំងស្រុងនៃការអភិវឌ្ឍ កម្មវិធីអាវុធនុយក្លេអ៊ែរ របស់ខ្លួនយ៉ាងយូរ​នៅឆ្នាំ​ក្រោយនេះ៕