(អាហ្សង់ទីន)៖ ប្រធានាធិបតីអាហ្សង់ទីន លោក Mauricio Macri បានចេញបញ្ជាឲ្យបើកការស៊ើបអង្កេតយ៉ាងហ្មត់ចត់មួយ ទៅលើករណីនាវាមុជទឹក ARA San Juan ដែលបានបាត់ខ្លួនដោយអាថ៌កំបាំង កាលពីថ្ងៃទី១៥ ខែវិច្ឆិកា នៅក្នុងមហាសមុទ្រអាត្លង់ទិកខាងត្បូង ជាមួយនិងក្រុមនាវិកចំនួន ៤៤នាក់។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅព្រឹកថ្ងៃសៅរ៍ ទី២៥ ខែវិច្ឆិកា ឆ្នាំ២០១៧។
លោកប្រធានាធិបតី បានថ្លែងប្រាប់ទៅកាន់ក្រុមអ្នកសារព័ត៌មាន ពីទីបញ្ជាការរបស់កងទ័ពជើងទឹកអាហ្សង់ទីន ក្នុងក្រុង Buenos Aires ថា «នេះគឺជាពេលវេលាដ៏លំបាកបំផុតមួយ សម្រាប់យើងទាំងអស់គ្នា ជាពិសេសក្រុមគ្រួសាររបស់នាវិកទាំង ៤៤នាក់តែម្តង។ លោក Macri បាននិយាយថា «ស្ថានការណ៍បែបនេះ ទាមទារឲ្យមានការស៊ើបអង្កេតដ៏ហ្មត់ចត់ និងស៊ីជម្រៅមួយ ដែលនឹងបញ្ជាក់ច្បាស់ថា តើនាវាមួយគ្រឿងដែលបានឆ្លងកាត់ការជួសជុលត្រឹមត្រូវរួចរាល់ ហើយស្ថិតក្នុងសភាល្អធម្មតាថែមទៀត បែរជាអាចផ្ទុះបានទៅវិញ នេះបើតាមខ្ញុំទទួលបានដំណឹង»។
យ៉ាងណាមិញ លោក Mauricio Macri បានសន្យាថា ប្រតិបត្តិការស្វែងរក នឹងនៅតែបន្ត ជាមួយការជួយជ្រោមជ្រែងពីសំណាក់សហគមន៍អន្តរជាតិ ដែលអាហ្សង់ទីនទទួលបាន។
គួរជម្រាបថា កាលពីម្សិលមិញនេះ កងទ័ពជើងទឹកអាហ្សង់ទីនបានរាយការណ៍ថា នាថ្ងៃដែលនាវាមុជទឹកនោះ បានឲ្យដំណឹងពីព្រឹត្តិការណ៍មួយ ដូចទៅនឹងហេតុការណ៍ផ្ទុះ ត្រូវគេប្រទះឃើញថា បានកើតមាននៅក្នុងតំបន់ ដែលនាវាមុជទឹក San Juan ធ្វើដំណើរ។ ទីតាំងចុងក្រោយបំផុតរបស់នាវាមុជទឹក ARA San Juan ដែលគេទទួលបានគឺនៅ ឈូងសមុទ្រ San Jorge ដែលមានចម្ងាយ ៤៤៤គីឡូម៉ែត្រ ភាគអាគ្នេយ៍ឧបទ្វីប Valdes៕
