(ពិភពលោក)៖ នៅថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថាតើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោះសូមទស្សនាដូចខាងក្រោម៖
១៖ សហរដ្ឋអាមេរិកបានបង្ហាញពី គោលជំហររឹងមំារបស់ខ្លួន តាមរយៈការថ្កោលទោស និងចោទប្រកាន់ថា យោធាមីយ៉ាន់ម៉ាកំពុងប្រព្រឹត្តអំពើសាហាវឃោឃៅប្រឆាំង នឹងជនជាតិរូហ៊ីងយ៉ា ហើយដែលក្នុងអំពើទាំងនោះអាចចាត់ទុកថា ជាការបោសសំអាតជនជាតិដើមភាគតិចមូស្លីមមួយនេះ៕
២៖ កាលពីជាងមួយខែមុន ក្រុមតារាវិទូនៅអាមេរិកបានប្រទះឃើញអាចម៍ផ្កាយមួយដុំដែលគេអះអាងថា មានប្រភពមកពីប្រព័ន្ធព្រះអាទិត្យផ្សេង ហើយវាពិតជារឿងដ៏រំភើប និងកម្រខ្លាំងណាស់ ក្នុងការមានឱកាសបានឃើញដំណើរមកដល់ នៃវត្ថុអវកាសដ៏អស្ចារ្យនោះ៕
៣៖ អូស្រ្តាលីបានអំពាវនាវឲ្យសហរដ្ឋអាមេរិក ខិតខំកសាងវត្តមានរបស់ខ្លួនឲ្យបានខ្លាំង នៅក្នុងតំបន់អាស៊ី និងពង្រឹងទំនាក់ទំនងជាដៃគូ ដែលមានចិត្តគំនិតដូចគ្នា ហើយទន្ទឹមនឹងនេះទីក្រុងកង់បេរ៉ា បានព្រមានពីការកើនឡើងឥទ្ធិពលរបស់មហាយក្សនៅក្នុងតំបន់នេះផ្ទាល់ គឺប្រទេសចិន៕
៤៖ អតីតអភិបាលរដ្ឋយីរ៉ូ (Rio de Janeiro) លោក Anthony Garotinho និងលោកស្រី Rosinha Garotinho ត្រូវបានចាប់ឃាត់ខ្លួននាសប្តាហ៍នេះ ក្រោមបទចោទប្រកាន់ថា បានប្រព្រឹត្តអំពើពុករលួយ៕
៥៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកឡើងពីផែនការរៀបចំកិច្ចប្រជុំមួយ ដើម្បីស្វែងរកសន្តិភាពបញ្ចប់សង្រ្គាមស៊ីវិល នៅក្នុងប្រទេសស៊ីរី នារយៈពេល ០៦ឆ្នាំមកនេះ។ លោក ពូទីន ថ្លែងបែបនេះនៅក្នុងសេចក្ដីថ្លែងការណ៍រួម បន្ទាប់ពីជំនួបជាមួយប្រធានាធិបតីអ៊ីរ៉ង់ លោក ហាស្សាន រួហានី និងប្រធានាធិបតីតួកគី លោក រេសិប តាយយីប អឺដូហ្កាន់៕
៦៖ ប្រទេសគុយបា និងកូរ៉េខាងជើង បានសន្យាពង្រឹងចំណងមិត្តភាពរវាងគ្នាកាន់ខ្លាំងឡើង ខណៈប្រទេសទាំងពីរកំពុងមានភាពតានតឹងនយោបាយជាមួយសហរដ្ឋអាមេរិក៕ 
">
