(បូលីវី)៖ រដ្ឋមន្ត្រីថាមពល និងឧស្សាហកម្មកាតា លោក Mohammed Saleh Abdulla Al Sada បាននិយាយថា ទីផ្សារឧស្ម័នសកលលោកអាចនឹងប្រឈមុខនឹងកង្វះខាតនៃឧស្ម័ន រាវធម្មជាតិ LNG នៅត្រឹមឆ្នាំ២០២៥ ដោយសារតែការខ្វះខាតនៃគំរោងចម្រាញ់ថ្មីៗ ខណៈតម្រូវការឧស្ម័នសម្រាប់ជំនួសធ្យូងថ្ម និងថាមពលនុយក្លេអ៊ែរកាន់តែកើនឡើង។ នេះបើតាមការចេញផ្សាយដោយ សារព័ត៌មាន Sputnik នៅរសៀលថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០១៧។
យោងតាម លោក Al Sada តម្រូវឧស្ម័ន LNG នឹងបន្តកើនឡើងនៅរយៈពេលប៉ុន្មានទសវត្សរ៍ខាងមុខនេះ ហើយអាចនឹងកើនឡើងដល់ ៥០០លានតោនក្នុងមួយឆ្នាំ គិតត្រឹមឆ្នាំ២០៣០ ក្រោមហេតុផលការកើនឡើង នៃតម្រូវការឧស្ម័នជំនួសធ្យូងថ្ម និងថាមពលនុយក្លេអ៊ែរ ព្រមទាំងការភិវឌ្ឍន៍ទីផ្សារថាមពល។
រដ្ឋមន្ត្រីថាមពលកាតារូបនេះ បញ្ជាក់នៅក្នុង កិច្ចប្រជុំ GECF ក្នុងប្រទេសបូលីវីកាលពីថ្ងៃពុធ ដូច្នេះថា «ការផ្គត់ផ្គងឧស្ម័នធម្មជាតិរាវ (LNG) នឹងកើនឡើងដល់ចំណុចកំពូលនៅឆ្នាំ២០២០ ប៉ុន្តែដោយសារតែគំរោងថ្មីៗ នៃឧស្ម័ន LNG ត្រូវបានគេរំពឹងថា នឹងមានចំនួនតិចតួចស្ដួចស្ដើង នោះវានឹងធ្វើឱ្យទីផ្សារ LNG នឹងចាប់ផ្ដើមរឹតត្បិត ដែលជាហេតុនឹងបង្កឱ្យមានកង្វះខាត ដល់ការផ្គត់ផ្គង់នៅឆ្នាំ២០២៥»។
គួរបញ្ជាក់ថា កិច្ចប្រជុំបណ្ដាប្រទេសអ្នកនាំចេញឧស្ម័ន ឬGECF ត្រូវបានរៀបចំឡើងនៅក្នុងប្រទេសបូលីវី តាំងតែពីថ្ងៃអង្គារមកម្ល៉េះ និងមានប្រទេសចូលរួមដូចជា អាល់ហ្សេរី, បូលីវី, អេហ្ស៊ីប, អេក្វាឌ័រ, ហ្គីណេ, អ៊ីរ៉ង់, លីប៊ី, នីហ្សេរីយ៉ា, កាតា, រុស្ស៊ី, ទ្រីនីដាត តូបាហ្គូ, វេណេស៊ុយអេឡា និងអេមីរ៉ាអារ៉ាប់រួម។ កិច្ចប្រជុំនេះនឹងត្រូវបញ្ចប់នៅថ្ងៃសុក្រសប្ដាហ៍នេះ៕
https://encrypted-tbn0.gstatic.com/images?q=tbn:ANd9GcQrUFBUS0gZXgBR0hqqUBtE_ZA4vpwif2OLlIHf057eUMYI_CX_
