(រីយ៉ូ)៖ អតីតអភិបាលរដ្ឋយីរ៉ូ (Rio de Janeiro) លោក Anthony Garotinho និងលោកស្រី Rosinha Garotinho ត្រូវបានចាប់ឃាត់ខ្លួននាសប្តាហ៍នេះ ក្រោមបទចោទប្រកាន់ថា បានប្រព្រឹត្តអំពើពុករលួយ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០១៧។
អតីតអភិបាលរដ្ឋទាំងពីរខាងលើ ដែលត្រូវជាគូស្វាមីភរិយានឹងគ្នាផងដែរនោះ កំពុងស្ថិតក្រោមការស៊ើបអង្កេត នៃករណីសង្ស័យមួយចំនួនរួមមាន ការប្រព្រឹត្តអំពើពុករលួយ, ការមានទំនាក់ជាមួយឧក្រិដ្ឋជន, និងរឿងក្លែងបន្លំសន្លឹកឆ្នោតជាដើម ហើយតុលាការបានសម្រេចចេញដីកាឲ្យឃាត់ខ្លួនអ្នកទាំងពីរ ដើម្បីបង្ការទុកជាមុន។
ការចាប់ខ្លួនបង្ការទុកជាមុន ដែលស្របទៅតាមច្បាប់នៃប្រទេសប្រេស៊ីល ត្រូវបានអនុវត្តចំពោះជនជាប់ចោទ ក្នុងអំឡុងពេលនៃការស៊ើបអង្កេត នៅពេលដែលពួកគេ បង្កគ្រោះថ្នាក់ដល់សង្គម ឬដើម្បីទប់ស្កាត់ហានិភ័យ ដែលថាពួកគេអាចឡើងយន្តហោះរត់គេចខ្លួន ឬមួយក៏បំផ្លាញភស្តុតាង និងគំរាមកំហែងសាក្សីជាដើម។
គួរជម្រាប តាមរយៈការចាប់ខ្លួនលោក និងលោកស្រី Garotinhos ខណៈពេលនេះ រដ្ឋរីយ៉ូមានអតីតអភិបាលចំនួន ០៣នាក់ហើយ ដែលកំពុងស្ថិតក្នុងពន្ធនាគារ ដោយសារតែពាក់ព័ន្ធនឹងអំពើពុករលួយ ដោយម្នាក់ទៀតមានឈ្មោះថា Sergio Cabral ដែលបានកាន់តំណែងបន្តពី លោកស្រី Rosinha Garotinho និងត្រូវគេចាប់ឃុំខ្លួនកាលពីចុងឆ្នាំ២០១៦៕
https://thumbs-prod.si-cdn.com/AUQeAYCSexH6Chu9Ul5IsIbST8c=/1072x720/filters:no_upscale()/
http://img2.thejournal.ie/article/3077636/river?version=3077741&width=630
