(វ៉ាស៊ីនតោន)៖ អភិបាលរដ្ឋកាលីហ្វរញ៉ា លោក Jerry Brown នៅថ្ងៃពុធសប្ដាហ៍នេះ បានសម្រេចចិត្តចេញបញ្ជាឱ្យលើកលែងទោស ដល់បុរសម្នាក់មានអាយុ ៧០ឆ្នាំ គឺលោក Craig Richard Coley ដែលត្រូវបានគេកាត់ទោស «ដាក់ពន្ធនាគារទាំងខ្លួនគ្មានកំហុស» ពីបទមនុស្សឃាតកាលពីឆ្នាំ១៩៨០។ នេះបើតាមការចេញផ្សាយដោយ ទីភ្នាក់ងារសារព័ត៌មាន ចិនស៊ីនហួរ នៅរសៀលថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០១៧។
លោក Coley ត្រូវបានចាប់ខ្លួនពាក់ព័ន្ធនឹងការស្លាប់របស់ស្ត្រីម្នាក់ឈ្មោះ Rhonda Wicht និងកូនប្រុសរបស់នាងអាយុ ០៤ឆ្នាំ ឈ្មោះ Donald កាលពីឆ្នាំ១៩៧៨ ក្នុងទីក្រុង Simi Valley ស្ថិតនៅចំងាយ ៧០គីឡូម៉ែត្រ ពីភាគខាងលិចទីក្រុងឡូសអាន់ជែឡែស។ ប៉ុន្តែពីរឆ្នាំក្រោយមក លោកត្រូវតុលាការកាត់ទោស ពីបទមនុស្សឃាត ទាំងលោកមិនមែនជាអ្នកប្រព្រឹត្ត ហើយមុននឹងត្រូវដោះលែង លោក Coley បានស្នើឱ្យ Board of Parole ដែលជាគណៈកម្មាធិការមួយ វិនិច្ឆ័យលើបទឧក្រិដ្ឋបើកការស៊ើបអង្កេតថ្មីមួយកាលពីឆ្នាំ២០១៥ តែរហូតដល់ថ្ងៃចន្ទកន្លងទៅ ទើបនាយកដ្ឋានប៉ូលិសទីក្រុង Simi Valley និងការិយាល័យរដ្ឋអាជ្ញានៃតំបន់ Ventura County ប្រកាសថា ផ្អែកលើការធ្វើតេស្ដ DNA លោក Coley ពិតជា ត្រូវបានគេកាត់ទោសដោយភ័ន្តច្រឡំ និងជាជនគ្មានកំហុសទាល់តែសោះ។
គួរបញ្ជាក់ថា បើតាមលោក Jerry Brown លោក Craig Richard Coley មិនដែលមានប្រវត្តិបទល្មើសឡើយ មុននឹងលោកត្រូវគេកាត់ទោសពីបទមនុស្សឃាត ហើយលោកគឺជាអ្នកទោសគំរូម្នាក់ អស់រយៈពេលជិត ០៤ទសវត្សរ៍មកនេះ។ វាមិនមែនជារឿងថ្មីនោះឡើយនៅអាមេរិក ដោយកាលពីប៉ុន្មានខែមុននេះ ក៏មានបុរសវ័យចំណាស់ម្នាក់ត្រូវបានដោះលែងពីគុកវិញដែរ ជាមួយនឹងសំណងរាប់លានដុល្លារ ដោយសារតែទើបរកឃើញថា ជាជនគ្មានកំហុស ប៉ុន្តែសម្រាប់លោកតា ឈ្មោះ Craig វិញគឺមិនទាន់មានព័ត៌មានណាអះអាងពីចំនួនទឹកប្រាក់សំណង ដែលបុរសវ័យចំណាស់បានទទួលរងភាពអយុត្តិធម៌បំផុតនេះ ត្រូវទទួលបាននោះឡើយ៕
