(តូក្យូ)៖ ក្រុមហ៊ុនជប៉ុនមានឈ្មោះថា ALE បានធ្វើសេចក្តីប្រកាសថា ខ្លួនកំពុងស្ថិតក្នុងការអភិវឌ្ឍ «បាតុភូតទេពច្យុតសិប្បនិម្មិត» ដំបូងបំផុតមិនធ្លាប់មាន នៅឆ្នាំ២០១៩។ ម៉្យាងវិញទៀត ពួកគេក៏បានបញ្ជាក់ដែរថា ទស្សនីយភាពនោះ នឹងអាចត្រូវមើលឃើញបានក្នុងរង្វង់ចម្ងាយជាង ២០០គីឡូម៉ែត្រ ជុំវិញតំបន់ Setouchi នៃប្រទេសជប៉ុន។ នេះបើតាមការដកស្រង់ការផ្សាយចេញពីវែបសាយ Newsweek នៅព្រឹកថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០១៧។
កាលបរិច្ឆេទនៃព្រឹត្តិការណ៍ដ៏អស្ចារ្យខាងលើ គឺអាស្រ័យទៅលើកាលវិភាគ នៃការបាញ់បង្ហោះផ្កាយរណប ដែលនឹងបង្កើតចេញជាបាតុភូតនេះនៅចុងឆ្នាំ២០១៨ ឬក៏ដើមឆ្នាំ២០១៩។ ក្រុមហ៊ុន ALE ក៏សង្ឃឹមដែរថា នឹងត្រៀមលក្ខណៈរួចរាល់ សម្រាប់ការបង្ហាញទស្សនីយភាពដ៏ពេញលេញមួយ នៅឯពិធីចាប់បើកព្រឹត្តិការណ៍កីឡាប្រកួតអូឡាំពិកឆ្នាំ២០២០ ដែលនឹងប្រព្រឹត្តទៅក្នុងទីក្រុងតូក្យូ។
ក៏ប៉ុន្តែនៅពេលដែលផ្កាយរណប ដែលមានប្រវែងតែជាងកន្លះម៉ែត្រប៉ុណ្ណោះនោះ ទៅដល់គន្លងអវកាសរបស់យើង តើពួកវានឹងបង្កើតបាតុភូតទេពច្យុតដោយរបៀបណា? ផ្កាយរណបទាំងនោះ នឹងត្រូវបានកំណត់ឲ្យបញ្ចេញដុំបាល់លោហៈ មានទំហំប៉ុនផ្លែប្លូប៊ើរី ពីរយៈកម្ពស់ជាង ៤៨០គីឡូម៉ែត្រពីផ្ទៃផែនដី។ ដុំអាចម៍ផ្កាយសិប្បនិម្មិតទាំងនេះ ត្រូវគេរាយការណ៍ថា ថ្លៃ ៨,០០០ដុល្លារក្នុងមួយដុំៗ។ ដូចទៅនឹងកាំជ្រួច ប្រភេទលោហៈខុសគ្នា ផលិតពណ៌ក៏ខុសៗគ្នាទៅតាមនោះដែរ។
គួរជម្រាបថា ទេពច្យុតធម្មជាតិកើតមានឡើង នៅពេលដែលគន្លងធ្វើដំណើររបស់ផែនដី បានឆ្លងកាត់តំបន់រាយប៉ាយខុសពីធម្មតាមួយនៅទីអវកាស ដែលជាទូទៅជាគឺកម្ទេចកម្ទីរ បន្សល់ទុកដោយផ្កាយដុះកន្ទុយ ដែលរសាត់អណ្តែតជុំវិញព្រះអាទិត្យ។ ស្របពេលដែលសំរាមអវកាសទាំងនោះ រួមមានលោហៈ ទឹកកក និងដុំថ្ម ចូលមកបរិយាកាសផែនដី ពួកវាបានឆាបឆេះឡើង ក្នុងរូបភាពដែលគេស្គាល់ថា ជាទេពច្យុត។
ភ្លៀងអាចម៍ផ្កាយ ឬទេពច្យុតពិតជារឿងអស្ចារ្យ នៃបាតុភូតធម្មជាតិ ប៉ុន្តែថាតើការសាកល្បង និងបង្ហាញពីបច្ចេកវិទ្យាកម្រិតកំពូលរបស់ប្រទេសជប៉ុន ក្នុងការធ្វើឲ្យបាតុភូតធម្មជាតិមួយ អាចក្លាយជារឿងបង្កើតឡើងដោយដៃមនុស្សនោះ វាពិតជារឿងដែលមិនគួរឲ្យនឹកស្មានដល់ ប៉ុន្តែវានឹងក្លាយជាការពិតក្នុងពេលឆាប់ៗ...៕
