(ម៉ូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានលើកឡើងពីផែនការរៀបចំកិច្ចប្រជុំមួយ ដើម្បីស្វែងរកសន្តិភាពបញ្ចប់សង្រ្គាមស៊ីវិល នៅក្នុងប្រទេសស៊ីរី នារយៈពេល ០៦ឆ្នាំមកនេះ។ លោក ពូទីន ថ្លែងបែបនេះនៅក្នុងសេចក្ដីថ្លែងការណ៍រួម បន្ទាប់ពីជំនួបជាមួយប្រធានាធិបតីអ៊ីរ៉ង់ លោក ហាស្សាន រួហានី និងប្រធានាធិបតីតួកគី លោក រេសិប តាយយីប អឺដូហ្កាន់។ នេះបើតាមការចេញផ្សាយដោយសារព័ត៌មាន BBC នៅព្រឹកថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០១៧។
នៅក្នុងសេចក្ដីថ្លែងការណ៍រួមនេះដែរ មេដឹកនាំនៃប្រទេសទាំងបី បានជំរុញឱ្យរដ្ឋាភិបាល និងក្រុមប្រឆាំងស៊ីរី ចូលរួមជាថ្មីក្នុងកិច្ចចរចាស្វែងរកសន្តិភាព ប្រកបដោយលក្ខណៈស្ថាបនា ។ ប៉ុន្តែព្រមពេលជាមួយគ្នា កាលបរិច្ឆេទសម្រាប់កិច្ចចរចា មិនត្រូវបានប្រកាសឡើង ខណៈគេជឿជាក់ថា កិច្ចប្រជុំនេះអាចនឹងត្រូវរៀបចំឡើងក្នុងទីក្រុង Sochi ប្រទេសរុស្ស៊ី។ មួយ វិញទៀត គំនិតផ្ដួចផ្ដើមរបស់ លោក ពូទីន កើតមានឡើងនៅចំពេលក្រុមប្រឆាំងស៊ីរី បានចូលរួមកិច្ចប្រជុំមួយក្នុងទីក្រុងរីយ៉ាដ ប្រទេសអារ៉ាប៊ីសាអូឌីត កាលពីថ្ងៃពុធ ដោយពួកគេបានព្រមព្រៀងគ្នាលើគោលជំហររួម មុននឹងចូលរួមកិច្ចចរាចាសន្តិភាពគំាទ្រជុំចុងក្រោយ រៀបចំឡើងដោយ UN នៅទីក្រុងហ្សឺណែវ ប្រទេសស្វីសនៅសប្ដាហ៍ក្រោយ។
គួរបញ្ជាក់ថា កិច្ចចរចាសន្តិភាព និងបទឈប់បាញ់សម្រាប់ស៊ីរី ត្រូវបានគេធ្វើឡើងជាច្រើនដងរួចមកហើយ ប៉ុន្តែមិនដែលបានទទួលជោគជ័យអ្វីធំដុំនោះទេ រីឯជម្លោះនៅតែបន្តកើតមាន ហើយប្រជាជនស៊ីរីនៅតែជាជនរងគ្រោះ នៅក្នុងបរិបទដែលសង្រ្គាមបច្ចុប្បន្ន ស្ទើរតែក្លាយជាសង្រ្គាមដណ្ដើមឥទ្ធិពលពីមហាអំណាច នៅក្នុងតំបន់តាមរយៈការគាំទ្រភាគីជម្លោះរៀងៗខ្លួន ក្នុងនោះតួកគី សហរដ្ឋអាមេរិក និងអារ៉ាប៊ីសាអូឌីតគំាទ្រក្រុមប្រឆាំងស៊ីរី ខណៈអ៊ីរ៉ង់ និងរុស្ស៊ីគាំទ្ររដ្ឋាភិបាលស៊ីរី៕
