(ហ្ស៊ីមបាវេ)៖ អតីតអនុប្រធានាធិបតីហ្ស៊ីមបាវេ លោក Emmerson Mnangagwa នឹងវិលត្រឡប់មកកាន់មាតុប្រទេសវិញ ហើយត្រូវ​ស្បថឡើងកាន់ជាតំណែងជាប្រធានាធិបតីបន្ត ពីលោក Robert Mugabe នៅសុក្រសប្តាហ៍នេះតែម្តង បន្ទាប់ពី​​នៅទីបំផុតលោក Mugabe ដែលជាមេដឹកនាំកាន់អំណាចយូរជាងគេបំផុតនៅអាហ្រ្វិក បានយល់ព្រមចុះចេញពីតំណែង។ នេះបើតាមការចេញ​ផ្សាយ​ដោយ​ទីភ្នាក់​ងារ​ព័ត៌មាន Reuters នៅល្ងាចថ្ងៃពុធ ទី២២ ខែវិច្ឆិកា ឆ្នាំ២០១៧។

ទីភ្នាក់ងារព័ត៌មានរដ្ឋហ្ស៊ីមបាវេ ZBC News បានធ្វើសេចក្តីរាយការណ៍នាថ្ងៃពុធនេះថា «លោកអតីតប្រធានាធិបតី ដែលត្រូវបាន​ចាកចេញពីប្រទេសកំណើត ក្រោយពីរូបលោកត្រូវបានបណ្តេញចេញពីបក្សនិងរដ្ឋាភិបាលនោះ នឹងវិលចូលមកជំនួសតំណែង​​លោក Robert Mugabe ដែលបានយល់ព្រមចុះចេញពីតំណែង»។

គួរជម្រាបថា កាលពីដើមសប្តាហ៍មុន កម្លាំងយោធាហ្ស៊ីមបាវេ ដែលមានចំណងទាក់ទងជិតស្និទ្ធនឹងលោក Mnangagwa បាន​សម្រេច​ចិត្ត ចូលធ្វើគ្រប់គ្រងកាន់កាប់ក្នុងរដ្ឋធានី Hahare  ក្រោយពីលោក Mugabe បានបណ្តេញលោក Emmerson Mnagawa ដែលជាសម្ព័ន្ធ​មិត្ត​​នយោបាយជាង៤០ឆ្នាំរបស់លោក ក្រោមការចោទ​ប្រកាន់ថា ពុំមានភាព​ស្មោះត្រង់។ ដោយឡែក ទង្វើនោះ​ត្រូវបានគេមើល​ឃើញ​ថា ជាការពង្រឹងអំណាច​របស់ លោក Mugabe ដែលមានចេតនា​ចង់តែងតាំងប្រពន្ធ​របស់លោក​ផ្ទាល់ ធ្វើជាអនុប្រធានាធិបតី​ជំនួស​វិញ៕