(ម៉ូស្គូ)៖ ប្រធានាធិបតីរុស្ស៊ី លោក វ៉ា្លឌីមៀ ពូទីន បានទទួលស្វាគមន៍ប្រធានាធិបតីស៊ីរី លោក បាស្សា អាល់ អាស្សាដ សម្រាប់កិច្ចពិភាក្សាមួយ ដែលមេដឹកនាំទំាងពីរបានឯកភាពគ្នាថា ប្រតិបត្តិការយោធានៅក្នុងប្រទេសស៊ីរីគួរតែត្រូវបញ្ចប់ ដើម្បីបើកផ្លូវឆ្ពោះទៅរកដំណោះស្រាយនយោបាយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅរសៀលថ្ងៃអង្គារ ទី២១ ខែវិច្ឆិកា ឆ្នាំ២០១៧។
នៅក្នុងសេចក្ដីថ្លែងការណ៍មួយ ចេញផ្សាយដោយវិមានក្រឹមឡាំង នៅថ្ងៃអង្គារនេះ លោក ពូទីន បានលើកឡើងដូច្នេះថា «យើងនៅមានផ្លូវវែងឆ្ងាយដែលត្រូវដើរ មុននឹងយើងទទួល បានជ័យជម្នះទំាងស្រុងលើពួកភេរវករ... ក៏ប៉ុន្តែទាក់ទិននឹងការងាររួមគ្នារបស់ពួកយើង ក្នុងការប្រយុទ្ធប្រឆាំងជាមួយពួកភេរវករ នៅលើទឹកដីស៊ីរី ប្រតិបត្តិការយោធានេះចាំបាច់ត្រូវតែ បញ្ចប់ឱ្យបានឆាប់ ហើយខ្ញុំគិតថាអ្វីដែលសំខាន់នៅពេលនេះ នោះគឺការស្វែងរកដំណោះស្រាយនយោបាយ ក៏ដូចជាធ្វើការងារជាមួយអ្នកចង់បានសន្តិភាព និងដំណោះស្រាយ ពិតប្រាកដដើម្បីបញ្ចប់សង្រ្គាម»។
គួរបញ្ជាក់ថា បើតាមវិមានក្រឹមឡាំង ជំនួបរវាងលោក ពូទីន និងលោក អាស្សាដ ត្រូវបានធ្វើឡើងកាលពីថ្ងៃចន្ទ ក្នុងទីក្រុង Sochi។ ក្នុងជំនួបនេះ លោក ពូទីន បញ្ជាក់ដែរថាលោក ចង់ជួបលោក អាស្សាដ នៅក្នុងកិច្ចប្រជុំមួយគ្រោងនឹងធ្វើឡើងនៅសប្ដាហ៍នេះ ក្នុងប្រទេសរុស្ស៊ី ដោយមានការចូលរួមពីមេដឹកនាំអ៊ីរ៉ង់ និងតួកគី ដែលសុទ្ធជាអ្នកបាននិងកំពុងលូកដៃ ក្នុងសង្រ្គាមនៅស៊ីរី៕
