(វ៉ាស៊ីនតោន)៖ ការសម្លាប់ជនស៊ីវិលដោយភ័ន្តច្រឡំ និងការបរាជ័យក្នុងការបញ្ជាក់ពីចំនួនជនស៊ីវិល ដែលបានបាត់បង់ជីវិតពីសំណាក់សហរដ្ឋអាមេរិក នៅក្នុងសង្រ្គាមប្រយុទ្ធប្រឆាំងនឹងពួកភេរវករ ISIS នឹងមានតែបញ្ឆេះការស្អប់ខ្ពើមក៏ដូចជា បង្កើតរូបភាពអាក្រក់របស់ មហាអំណាចប្រជាធិបតេយ្យមួយនេះ នៅលើឆាកអន្តរជាតិតែប៉ុណ្ណោះ។ នេះបើតាមសកម្មជន សន្តិភាពពិភពលោក លោកស្រី Helen Caldicott ដកស្រសង់ដោយសារព័ត៌មាន Sputnik នៅរសៀលថ្ងៃអង្គារ ទី២១ ខែវិច្ឆិកា ឆ្នាំ២០១៧។
ថ្លែងនៅក្នុងបទសម្ភាសន៍ជាមួយ Sputnik លោកស្រី Helen Caldicott បានលើកឡើងយ៉ាងដូច្នេះថា «យោធាអាមេរិកមិនបានរាប់ចំនួនជនស៊ីវិល ដែលពួកគេបានសម្លាប់ដោយភ័ន្តច្រឡំនោះទេ ដោយពួកគេរាប់តែចំនួនកងទ័ពអាមេរិក ដែលបានស្លាប់តែប៉ុណ្ណោះ... វាគឺជាការវាយប្រហារតាមផ្លូវអាកាស សម្លាប់មនុស្សពីចំងាយ ដោយយន្ដហោះគ្មានមនុស្សបើក រីឯ មនុស្សជាច្រើនចង់ដឹងថា ហេតុអ្វីបានជាយុវជនវ័យក្មេង ចូលរួមជាមួយពួកភេរវករ ហើយតើអ្នកមានអារម្មណ៍យ៉ាងណា នៅពេលបានឃើញម្ដាយរបស់អ្នក នៅមុនសេចក្ដីស្លាប់ធ្លាក់ចុះពីលើមេឃ»។
លោកស្រី Helen បានបង្កត់ធ្ងន់ថា «ជាងនេះទៅទៀត នៅពេលខ្ញុំបានអានដំបូងពីយន្ដហោះគ្មានមនុស្សបើក និងសមត្ថភាពសម្លាប់មនុស្សពីចំងាយរបស់វា ខ្ញុំពិតជារន្ធត់ណាស់ ខណៈយោធាអាមេរិក ចូលចិត្តប្រើវានៅក្នុងសង្រ្គាម ដោយហេតុថា វាមិនបណ្ដាលឱ្យយោធាអាមេរិកណាម្នាក់ ធ្លាក់ចូលក្នុងរណ្ដៅគ្រោះថ្នាក់ ក៏ប៉ុន្តែចង់ឬមិនចង់ ការសម្លាប់ជនស៊ីវិលដោយភ័ន្តច្រឡំ និងការ បរាជ័យក្នុងការបញ្ជាក់ពីចំនួនជនស៊ីវិល ដែលបានបាត់បង់ជីវិតពីសំណាក់សហរដ្ឋអាមេរិក នៅក្នុងសង្រ្គាមប្រយុទ្ធប្រឆាំងនឹងពួកភេរវករ ISIS នឹងមានតែបញ្ឆេះការស្អប់ខ្ពើម ក៏ដូចជាបង្កើតរូបភាពអាក្រក់របស់ទីក្រុងវ៉ាស៊ីនតោន នៅលើឆាកអន្តរជាតិតែប៉ុណ្ណោះ»។
គួរបញ្ជាក់ថា លោកស្រី Helen Caldicott គឺជាស្ថាបនិកនៃPhysicians for Social Responsibility ដែលជាអង្គការមួយទទួលបានសហពានរង្វាន់ណូបែលសន្តិភាព កាលពីឆ្នាំ១៩៨៥៕
http://s3.reutersmedia.net/resources/r/?m=02&d=20170102&t=2&i=1167351340&r=LYNXMPED010GJ&w=1280
