(បរទេស)៖ នៅថ្ងៃសៅរ៍ ទី១៨ ខែវិច្ឆិកា ឆ្នាំ២០១៧នេះ ព្រឹត្តិការណ៍អន្តរជាតិសំខាន់ៗ ជាច្រើនបានកើតឡើង រួមមានទាំងព្រឹត្តិការណ៍នយោបាយ គ្រោះធម្មជាតិ និងស្ថានការណ៍ទូទាំងសកលលោកដ៏គួរឲ្យចាប់អារម្មណ៍ជាច្រើន។ ដូច្នេះបើចង់ដឹងថា តើព្រឹត្តិការណ៍រូបភាពប្រចាំថ្ងៃនេះមានអ្វីខ្លះនោ សូមទស្សនាដូចខាងក្រោម៖
១៖ មនុស្សម្នាជាងមួយម៉ឺននាក់ រួមគ្នាដង្ហែរធ្វើបាតុកម្ម នៅក្នុងទីក្រុងអាតែន នៃប្រទេសក្រិច ក្នុងឱកាសគម្រប់ខួប៤៤ឆ្នាំនៃបដិវត្តន៍ ប្រឆាំងនឹងរបបសឹកដែលមានរយៈពេលដឹកនាំ០៧ឆ្នាំ ហើយព្រឹត្តិការណ៍នេះហើយ ដែលបានជួយស្តារលទ្ធិប្រជាធិបតេយ្យឡើងវិញនៅក្នុងប្រទេសអឺរ៉ុបនេះ។
២៖ ប្រធានាធិបតីតួកគី លោក Recep Tayyip Erdogan ប្រកាសពីការសម្រេចដកកងទ័ពរបស់ខ្លួន ចេញពីធ្វើសមយុទ្ធយោធារបស់អង្គការ NATO នៅប្រទេសន័រវែស បន្ទាប់ពីរូបថតនិងឈ្មោះ របស់បិតាស្ថានិកតួកគីលោក Mustafa Kemal Ataturk ព្រមទាំងរបស់លោក Erdogan ផ្ទាល់ បានលេចឡើងក្នុងតារាងសត្រូវ នាអំឡុងពេលនៃការធ្វើសមយុទ្ធ។
៣៖ ប្រជាជនហ្ស៊ីមបាវេ នាំគ្នាធ្វើបាតុកម្មដើម្បីទាមទារឲ្យប្រធានាធិបតី លោក Robert Mugabe ស្ថិតក្នុងវ័យ៩៣ឆ្នាំ ដែលជាមេដឹកនាំកាន់អំណាចបានយូរជាងគេបង្អស់នៅអាហ្រ្វិក ចុះចេញពីតំណែង ស្របពេលដែលកម្លាំងយោធាបាននិងកំពុងគ្រប់គ្រងស្ថានភាពក្នុងរដ្ឋធានា Harare កាលពីប៉ុន្មានថ្ងៃមុន។
៤៖ គ្រោះរញ្ជួយដីកម្រិតធ្ងន់៦.៩រ៉ិចទ័រ វាយប្រហាតំបន់ទីបេ ភាគនិរតីប្រទេស ក្បែរព្រំដែនជាមួយប្រទេសឥណ្ឌា ប៉ុន្តែហេតុការណ៍នេះ ទំនងជាពុំបានបង្កឲ្យមានមនុស្សបាត់បង់ជីវិតឡើយ។ ដោយឡែក មនុស្ស០៣នាក់ ត្រូវគេរាយការណ៍ថារងរបួស ហើយមានការដាច់ចរន្តអគ្គិសនីនៅតាមតំបន់មួយចំនួន ខណៈលំនៅខ្លះបានរងការខូចខាត និងផ្លូវជាតិមួយខ្សែ ត្រូវបានរាំងស្ទះ ដោយសារថ្មភ្នំបាក់ស្រុតចំ។
៥៖ ប្រជាជនអ៊ីរ៉ង់ កំពុងតែទទួលជំនួយ បន្ទាប់ពីគ្រោះរញ្ជួយផែនដីដ៏កក្រើក បានវាយប្រហារប្រទេសអ៊ីរ៉ង់ កាលពីចុងសប្តាហ៍មុន។ តួលេខចុងក្រោយបំផុត បានបង្ហាញថាមនុស្សចំនួន៤៧៤នាក់បានស្លាប់ ,៩,៣៨៨នាក់ បានរងរបួស, ប្រមាណ១០០,០០០នាក់បាត់បង់លំនៅឋាន និងអគារប្រហែល៣០,០០០ខ្នង ត្រូវបានបំផ្លិចបំផ្លាញទាំងស្រុង។
៦៖ ទឹកជំនន់នៅជាយទីក្រុងអាតែន ប្រទេសក្រិច ផ្តាច់ជីវិតមនុស្សយ៉ាងតិច១៩នាក់។
៧៖ ម៉ិចស៊ីកូ ចាប់ផ្តើមពិធីបុណ្យបាឡុងអន្តរជាតិឆ្នាំ២០១៧ នៅឯទីក្រុង Leon នៃរដ្ឋ Guanajuato ដែលនឹងបន្តប្រព្រឹត្តទៅរហូតដល់ថ្ងៃទី២០ ខែវិច្ឆិកា ជាមួយវត្តមានបាឡុងប្រមាណ២០០គ្រឿង ដែលមានរូបរាងក៏ដូចជាពណ៌ប្លែកៗនិងចម្រុះបែប ខណៈមនុស្សជាងកន្លះនាក់ ត្រូវគេរំពឹងថានឹងចូលរួមទស្សនាក្នុងព្រឹត្តិការណ៍រយៈពេល០៤ថ្ងៃនេះ៕
