(អាហ្វ្រិក)៖ យោធាហ្ស៊ីមបាវេបានប្រកាស តាមកញ្ចក់ទូរទស្សន៍រដ្ឋ ដែលខ្លួនកំពុងធ្វើការគ្រប់គ្រងទាំងស្រុង ចាប់តាំងពីពេលទៀបភ្លឺថ្ងៃទី១៥ ខែវិច្ឆិកានេះថា កងទ័ពមិនបានធ្វើរដ្ឋប្រហារនោះឡើយ ប៉ុន្តែការបញ្ជូនកម្លាំង និងចល័តរថពាសដែក មកកាន់រដ្ឋធានីពេលនេះ គឺដើម្បីចាត់ការមនុស្សជំនិតៗមួយចំនួនរបស់ ប្រធានាធិបតី លោក Robert Mugabe ដែលបានធ្វើឲ្យសង្គម និងសេដ្ឋកិច្ចច្របូកច្របល់ ហើយមេដឹកនាំវ័យ ៩៣ឆ្នាំរូបនេះ កំពុងស្ថិតនៅក្នុងសុវត្ថិភាពជាធម្មតានោះទេ។ នេះបើតាមការចេញផ្សាយព័ត៌មាននៅមុននេះបន្តិច ដោយសារព័ត៌មាន BBC នារសៀលថ្ងៃពុធ ទី១៥ ខែវិច្ឆិកា ឆ្នាំ២០១៧។
ការអះអាងខាងលើនេះរបស់យោធា បន្ទាប់ពីមានព័ត៌មានផ្ទុះឡើងថា យោធាធ្វើរដ្ឋប្រហារទម្លាក់ លោក Mugabe ពីអំណាច ហើយកំពុងតែឃុំខ្លួនលោកថែមទៀតផង ដោយមិនបានបញ្ជាក់ថា លោកកំពុងស្ថិតនៅទីណានោះឡើយ។ នៅមុនហេតុការណ៍ស្ងប់ស្ងាត់បន្តិច មានសាក្សីបានលឺស្នូរកាំភ្លើង និងការផ្លោងកាំភ្លើងធំ ស្ថិតនៅភាគខាងជើង នៃរដ្ឋធានី Harare កាលពីព្រឹកថ្ងៃពុធនេះតែម្តង។ សម្រាប់ព័ត៌មានជាផ្លូវការពេលនេះ ទំនងជាមិនទាន់មានភាពច្បាស់លាស់នោះឡើយ ខណៈយោធាជាអ្នកគ្រប់គ្រងប្រព័ន្ធផ្សព្វផ្សាយទាំងអស់។
លោក Mugabe បានក្លាយជាមេដឹកនាំប្រទេស យូរជាងគេនៅអាហ្វ្រិក និងតែមួយគត់របស់ហ្ស៊ីមបាវេ បន្ទាប់ពីប្រទេសស្ថិតនៅភាគខាងត្បូងទ្វីបអាហ្វ្រិកមួយនេះ ទទួលបានឯករាជ្យពីអង់គ្លេសនៅឆ្នាំ១៩៨០។
នៅព្រឹកមិញនេះមានសេចក្តីរាយការណ៍ថា កងកម្លាំងយោធារួមជាមួយនឹងកងកម្លាំងការពារជាតិ ហ្ស៊ីមបាវេ (ZDF) ត្រូវបានគេរាយការណ៍ថា បានធ្វើការគ្រប់គ្រងកាន់កាប់រាល់បណ្តាញសារព័ត៌មានទាំងអស់ក្នុងស្រុក ដែលវាគឺជាផ្នែកនៃការធ្វើរដ្ឋប្រហារទម្លាក់លោក Robert Mugabe។ ហេតុការណ៍នេះបានកើតឡើងនៅរយៈពេល ០២ថ្ងៃ បន្ទាប់ពីកម្លាំងយោធា បានព្រមានថា នឹងលូកដៃចូលកិច្ចការនយោបាយ ដើម្បីបញ្ចប់ភាពតានតឹង ដែលបង្កឡើងដោយសារតែ ការបណ្តេញអនុប្រធានាធិបតីហ្ស៊ីមបាវេ ដែលគេមើលឃើញថា អាចជាអ្នកស្នងតំណែងបន្តពីប្រធានាធិបតី លោក Robert Mugabe ចេញពីអំណាច។
គួរជម្រាបថា កាលពីសប្តាហ៍មុន លោក Mugabe បានបណ្តេញអនុប្រធានាធិបតី លោក Emmerson Mnagawa ដែលជាសម្ព័ន្ធមិត្តនយោបាយជាង ៤០ឆ្នាំរបស់លោក ក្រោមការចោទប្រកាន់ថា ពុំមានភាពស្មោះត្រង់។ ដោយឡែក ទង្វើនេះត្រូវបានគេមើលឃើញថា ជាការពង្រឹងអំណាចរបស់ លោក Mugabe ដែលមានចេតនាចង់តែងតាំងប្រពន្ធរបស់លោកផ្ទាល់ ធ្វើជាអនុប្រធានាធិបតីជំនួសវិញ៕
